Lideri i opozitës e ka konsideruar si fitore personale, vendimin e Gjykatës Kushtetuese për heqjen e mandatit të deputetit të PS-së, Koço Kokëdhima.
Siç e bëri të ditur tesheshi.com, pak orë më parë, duket se ky vendim ka qenë pjesë e një marrëveshje e pashkruar që do ta detyronte PD-në të votonte reformën për drejtësi.
Pas shpalljes së vendimit të institucionit që intepreton ligjin themeltar të shtetit, Basha ka dalë në selinë blu dhe pa asnjë hezitim e ka cilësuar si “fitore të drejtësisë”, ndërkohë që në çdo deklaratë ditë më parë theksonte se në Shqipëri nuk ka ndëshkim.
“Vendimi i Gjykatës Kushtetuese për heqjen e mandatit të Koço Kokëdhimës është një triumf i ligjit dhe i drejtësisë, edhe pse paligjshmëria dhe zullumi i oligarkëve është i pamatë e i pafund, e nuk mbaron me të dekretuarin prej Ramës si kryeministri i Jugut”, tha lideri i opozitës.
Pasi shpalli se “rasti Kokëdhima” është beteje e fituar e opozitës, Basha e lidhi atë me lobimin e tij në strukturat e BE-së.
”Megjithatë, kjo është një betejë e fituar e Kushtetutës me shkelësin e saj, e ligjit me abuzuesin, e Partisë Demokratike me oligarkun, e qytetarëve me hajdutin. Ky është vendim drejtësie në Ditën e Europës.”, tha Basha në deklaratën për media. /tesheshi.com/
