Lulzim Basha fiton një betejë të rëndësishme dhe ka shansin e rëndësishëm që ta përdorë si kartë të vyer për të rimarrë nismën politike në vend.
Kërkesa e opozitës për të futur numërimin elektronik në vend duket se është pranuar më në fund dhe pritet të implementohet në zgjedhjet e ardhshme lokale.
Ka qenë ambasadori i OSBE-së në Tiranë, Bernd Borchard, që e ka bërë publike këtë vendim gjatë një interviste. Sot u zhvillua një takim në Tiranë për reformën zgjedhore.
“Futja e numërimit elektronik mund të ndihmonte më tej në depolitizimin e administratës zgjedhore”, tha Borchard.
Sot, me nismën e OSBE-së është mbledhur Komisioni Parlamentar i Reformës Zgjedhore, ku janë ulur përballë bashkëkryetarët e PD-së, Oerd Bylykbashi dhe ai i PS-së, Blendi Çuçi.
Qëndrimi OSBE-së është i pari pas një periudhe të gjatë hezitimi nga ana e këtij organizmi për disa vite. Ndërkombëtarët kanë hezituar për votimin dhe numërimin elektronik nga frika e ndërhyrjes ruse.
Në vitin 2017 kur u fut në çadër, Lulzim Basha e kishte si kusht të panegocueshëm përdorimin e votimit elektronik, por që u quajt i parakohshëm nga ana e OSBE-ODIHR-it, për arsye se do të duhet një periudhë ku ai të testohet e eksperimentohet.
Por tani siç duket ata nuk mund të injorojnë një nga kërkesat kryesore dhe të panegocueshme të opozitës, pasi është bërë edhe një konsultim i gjërë, por edhe shkalla e agresionit nga ana e Moskës nuk konsiderohet aq shumë i pandalshëm.
Disa vende të BE-së, si Holanda e Franca në vitin 2016 e hoqën përkohësisht nga përdorimi votimin elektronik, pikërisht nga frika e hakerimit.
Numërimi elektronik sipas të gjitha gjasave do të implementohet në zgjedhjet lokale të 2019-s, ndërkohë që deri atëherë do të krijohen kushtet e përshtatshme për të ngritur sistemin dhe për ta mbrojtur atë nga ndërhyrjet e jashtme.
Siç mësohet, SHBA dhe BE do të monitorojnë të gjithë infrastrukturën për të krijuar koracimin e duhur, ndërkohë që paratë do t’i japë sipas të gjitha gjasave Brukseli dhe qeveria gjermane .
Deri tani ekzistojnë dy variante për testimin e numërimit elektronik: i pari është që në zgjedhjet për 61 bashkitë të implementohet një sistem pilot në disa bashki e jo në të gjitha, dhe i dyti është që të integrohet në të gjithë vendin.
Nëse do të rezultojë i suksesshëm, numërimi elektronik do të përdoret edhe për zgjedhjet parlamentare të vitit 2021, ku si plan paraprak është integrimi i votës së emigrantëve që votojnë jashtë vendit, duke aplikuar votën elektronike.
Ende nuk është përfunduar plani i detajuar se si do të kryehet organizimi me aktorë shqiptarë apo të huaj, por OSBE-ODIHR do menaxhojë monitorimin e procesit.
Diplomati veteran gjerman i cili drejton prezencën e OSBE-së në Tiranë, Bernd Brchard, u bëri thirrje politikanëve që të jenë më konstruktivë.
“Shqipëria ka nevojë për politikanë që janë vërtet të përkushtuar ndaj punës esenciale të parlamentit dhe që respektojnë rolin e parlamentit modern, në vend që të japin shfaqje politike shkatërruese”, tha ai.
Deri tani Komisioni i Posaçëm për Reformën Zgjedhore është mbledhur disa here dhe ka qenë në fakt shembulli më pozitiv se palët mund të bashkëpunojë.
Ashtu pa zhurmë, komisioni ka marrë disa vendime substanciale.
PD dhe PS kanë aritur si rrallë ndonjëherë të përcaktojnë gjashtë objektiva të përbashkëta të punës së tyre, ku futen edhe rekomandimet e OSBE/ODIHR-it, si dhe kanë vendosur edhe afate.
Ambasadori i OSBE-së e konsideroi frytin e këtij bashkëpunimi si “një dokument shumë i rëndësishëm, i cili hedh themelet e punës së Komisionit gjatë muajve në vijim”.
Komisioni do të nisë në të ardhmen së bashku me ambasadorin e OSBE-së një proces të gjerë konsultimi me organizata të shoqërisë civile aktive në fushën e zgjedhjeve. /tesheshi.com/
