Kryetari i Partisë Demokratike, Lulzim Basha, humbjen e Dibrës e shikon si një megablerje masive votash e kryer nga a që e quajti “karteli i drogës”.
Në një deklaratë publike, pas shpalljes së rezultatit zyrtar për Dibrën Basha nuk pranoi asnjë gabim nga ana e opozitës.
“Në Dibër nuk humbi një parti politike, por humbi e gjithë Shqipëria. Në Dibër humbën dhe të varfërit që u joshën nga paratë e krimit nga paratë e drogës. Të vetmit që fituan ishin karteli i drogës dhe klientët e krimit të Edi Ramës”, tha Basha.
Kreu i PD tha se partia që ai drejton bëri më të mirën në këto zgjedhje, duke vendosur në krye kandidatin e duhur.
“Zgjodhën të votojnë të keqen, e kuptoj gjendjen e tyre, dhe zgjedhjen që bënë. U premtoj se do të luftoj edhe për lirinë e tyre nga varfëria, pamundësia, nga frika. Do të luftoj që jeta e tyre të mos varet nga politika. Ne bëmë më të mirën që mundëm gjatë kësaj fushate. Donim sinqerisht që të bënim një ndryshim për mirë në Dibër. Zgjodhëm një kandidat të shkëlqyer, Sherefedin Shehun, të panjollosur. Dua ta falenderoj për kontributin, përpjekjen dhe kurajon e tij”, tha Basha.
Ne i shpallim sot luftë kartelit të drogës e krimit, tha Basha. “Demokratët janë në krye të kësaj lufte dhe unë në krye të tyre”, përfundon kryetari i Partisë Demokratike.
/tesheshi.com/
