Lulzim Basha duket se po rikthen figurat e vjetra të Partisë Demokratike në një kohë që ka paralajmëruar aksion të ri politik kundër kanabisit. Së fundmi, në krah të Lulzim Bashës janë parë të angazhuar disa figura që vite më parë kanë qenë ministra apo deputetë aktivë dhe këshilltarë.
Së fundmi në aktivitetet publike dhe jo publike të Bashës kanë marrë pjesë ish-ministri Besnik Mustafaj, ish-deputeti Selami Xhepa dhe ish-deputeti Dashnor Sula. Ndërkohë, po aq aktivë janë shfaqur në disa prej takimeve të Bashës me bazën, edhe ish-ministri Jemin Gjana si dhe ish-ministri Ferdinand Xhaferaj. Ish-ministri i Jashtëm, Besnik Mustafaj është shfaqur shpeshherë në krah të Lulzim Bashës, ndërsa ka kritikuar ashpër ish-drejtuesin e Partisë Demokratike, Sali Berishën. Besnik Mustafaj u pa i angazhuar në fushatën e opozitës në zgjedhjet lokale të Bashkisë së Dibrës. Po ashtu, ai është aktiv edhe me shkrime në media. Ndërsa dalja e tij e fundit me Bashën ka qenë dy ditë më parë, në një tryezë të zgjeruar me përfaqësues mediash, personalitete nga arti, kultura dhe profesionistë të fushave të ndryshme.
Në Dibër është parë dhe Selami Xhepa, tashmë pedagog në UET, ndërsa po rikthehet dhe Ferdinand Xhaferi, i cili është pretendenti kryesor për të marrë drejtimin e degës së PD-së të Durrësit, në një kohë që vetëm pak muaj më vonë mbahen zgjedhjet parlamentare.
Edhe pse jo të pranishëm në tryeza me Lulzim Bashën, ish-deputeti Dashnor Sula mësohet se është aktiv sa i përket riorganizimit të degëve të Qarkut të Elbasanit. Ai bën takime të rregullta me strukturat e PD-së në Peqin dhe Elbasan. Po ashtu, ish-ministri i Bujqësisë, Jemin Gjana është caktuar nga Basha në krye të një departamenti në PD, për Kontributet Historike. Po ashtu, atij i është besuar ristrukturimi i degëve të PD në Qarkun Lezhë. /tesheshi.com/
