Në një intervistë të fundit, inxhinierja Luljeta Bozo, afro të 80-ve në moshë, njëherësh kandidate për deputete e PS-së, tha se ka dy synime në rolin e saj të pritshëm parlamentar.
“Për moshën që kam them se kam akoma për të përmirësuar gjendjen e pensionistëve dhe për t’i aktivizuar në disa probleme shoqërore ku do ta ndiejnë veten shumë mirë dhe shumë të dobishëm për shoqërinë.
Fusha e dytë që kam prioritet është fusha e kërkimit shkencor. Kjo do të jetë e bashkangjitur me zhvillimin e arsmimit të lartë, pasi s’mund të zhvillohet arsimi pa kërkim shkencor”, tha Bozo duke folur për shqiptarja.com.
Ajo sqaroi se prania në media nuk është për famë personale por për t’u shërbyer njerëzve. Madje edhe kandidimin e sheh të tillë.
“Një javë rrjesht kam qenë në të gjithë televizionet pa asnjë interes, pasi unë nisem nga parimi i të mirës ‘të mirën bëje hidhe në det se nuk të humbet’.
Takoj njerëz pafund, s’i njoh fare, më japin falënderime që pranova të kandidoj. Shprehin dëshirën se ne duam kështu njerëzish që të na përfaqësojnë”, shprehet Bozo.
Ajo shton se ka një regjim ditor ushtarak sa i përket mënyrës së shfrytëzimit të ditës.
Gjënë më të shtrenjtë kam kohën, se po të iku koha nuk rikuperohet. Kam 56 vjet që punoj pa ndërprerje. Librin e parë e kam nxjerrë në ’75-ën. Deri më sot janë bërë gati 35 libra të botuar. Çohem shumë herët në 4 e gjysmë ose 5. Bëj një ecje 5 km. Ky është regjimi ditor i ushtarit”, shprehet znj. Bozo. /tesheshi.com/
