Nga Blendi Gashi
Njeriu që alarmoi botën për atë që ndodhi në Reçak (ku u masakruan 45 banorë, fëmijë, gra e pleq) në janar të vitit 1999, ish-ambasadori Uilliam Uoker edhe me rastin e 19-vjetorit të kësaj masakre ka treguar qartë zhgënjimin e madh që ka tek politikanët kosovarë, që atë kohë ishin prijës të luftës.
Megjithatë, nga të gjithë politikanët ai ka një më të “urryerin”. Ky është presidenti aktual Hashim Thaçi, me të cilin ka vite që nuk ka raporte të mira, çka kanë sjellë edhe mosshtrirje të dorës ndaj njëri-tjetrit.
Edhe në këtë përvjetor ata u panë “sy më sy”, dhe Uoker këtë herë ja zgjati dorën Thaçit por në të njëjtën kohë tregoi qartë zhgënjimin që ka në të.
Uoker pas fjalës së mbajtur në akademinë përkujtimore, ka bërë një veprim interesant.
Një lule të cilën ia kishte dhuruar një vajzë e vogël, mbesa e një familjari të vrarë në masakrën e Reçakut, Uoker të njëjtën ia dhuroi presidentit Thaçi, pas kritikave që politikanët kosovarë kanë harruar Reçakun pasi vetëm në tre vitet e fundit shkojnë për homazhe atje.
“Një vajzë e vogël, mbesa apo stërmbesa, ndoshta e një prej viktimave të Reçakut, më dha këtë lule, të cilën dua t’ia jap presidentit, Hashim Thaçi. Ruaje atë, vendose në zyrën tënde dhe përkujtoi gjithmonë të rënët e Reçakut. Kujtoje gjithmonë rëndësinë që ka Kosova për Kosovën”, ka thënë Uoker teksa më pas Thaçi i është bashkuar atij në foltore dhe ka marrë lulen në fjalë.
Kjo lule e dhuruar nga Uoker pikërisht për Thaçin e jo për ndonjë politikan tjetër, tregon qartë se ish-ambasadori i OSBE-së më së shumti ndjehet i zhgënjyer nga Thaçi, sidomos për mënyrën si ka rrugëtuar në politikë paslufte, gjë që e ka thënë dhe hapur në intervista.
Pra përmes kësaj luleje, Uollkeri sikur i tha Thaçit se ka harruar gjakun e derdhur të kosovarëve për karrigen e pushtetit dhe privilegjet që sjell ajo.
Më 2017-të, Uoker e Thaçi s’folën mes vete…
Se mes tyre nuk ka një miqësi dhe e shohin me zor njëri-tjetrin në sy, u tregua edhe një vit më parë, pra më 15 janar të 2017-tës ku nuk u përshëndetën në përvjetorit e 18-të, kur u zbulua shtatorja e Uokerit në Reçak.
“U keqpërdora nga Thaçi”
Se nuk e vlerëson si lider Thaçin dhe është plotësisht i zhgënjyer nga ai, Uoker e tha haptas edhe më 14 janar të 2017-tës në një intervistë të dhënë për emisionin “Personale” të Televizionit “Dukagjini”.
“Ai është burrë i pashëm. Ka mësuar shumë ndër vite se si t’i mbajë të lumtur ndërkombëtarët. Pas pavarësisë nuk e mori përgjegjësinë dhe më shumë ishte i fokusuar se si t’i mbajë të kënaqura ambasadat se sa qytetarët. Nuk jam admirues i tij”, deklaroi ai.
Uoker për më tepër tregoi një rast kur është keqpërdorur nga Thaçi.
“Konsideroj se jam keqpërdorur nja dy herë nga ai. Pas lufte e takova në Pejë dhe u ula për të pirë kafe me të. Më ftoi që të ecnim në rrugë dhe pasi ecnim më ftoi te një turmë njerëzish që kishin dalë ta prisnin dhe unë gjeta veten në mbështetje të tij në atë takim”, deklaroi Uoker një vit më parë.
Sipas ish-ambasadorit, Thaçi është njeri interesant, por thotë se koha e tij ka kaluar.
“Ka qenë kryeministër tash president. I ka kaluar koha”, deklaroi Uoker.
I pyetur se a ka qenë e mundshme që Thaçi t’i bëj gjërat më mirë, Uoker përgjigjet: “Absolutisht po”.
Kujtojmë se si përfaqësues i misionit vëzhgues të OSBE-së, Walker në rrethana të luftës në Kosovë, masakrën Reçakut të regjimit të Millosheviqit e kishte quajtur “krim kundër njerëzimit”. /tesheshi.com/
Deklaratën e Uoker për Thaçin dhënë në TV “Dukagjini” më 14 janar 2017-të mund ta gjeni në videon e mëposhtme nga minuta e 40-të.
https://www.youtube.com/watch?v=SiLmbbTtZyQ
Kurse në linkun më poshtë mund ta shihni si Uoker më 15 janar 2015 nuk i flet Thaçit:
