Punonjësit e gjelbërimit të bashkisë së Tiranës po shkulin pemët nga një lulishte në Tiranë. Një video e shpërndarë nga një faqe në facebook “Qytetarët për Parkun” tregon se si në lulishten pranë ish-Parkut të Autobuzave pemët e shkulura ngarkohen në kamionët e bashkisë për t’u transportuar diku tjetër. Qytetari Albi Dine shkruan se lulishtja do të zëvëndësohet me një pallat. Leja e ndërtimit, sipas tij, i është dhënë kompanisë Arlis Ndërtim me pronar Besnik Sulajn.
“Kjo është lulishtja ngjitur me policinë Bashkiake. Sot bashkia erdhi dhe shkuli gjithe pemët sepse në këtë lulishte kanë planifikuar të ndërtojnë një kompleks 100.000 m2 ndërtim. Firma ndërtuese do të jetë Arlis Ndertim e Besnik Sulajt, pronarit të Taiëan dhe Armos. Lejet janë dhënë, por ndërtimi do të filloje mbas zgjedhjeve. Ka vetëm një mënyrë se si kjo hapësirë mund të shpetohet: revolta e banorëve. Nëse heshtim, t’a gëzojmë betonin”- shkruan aktivisti Albi Dine.
Kjo zonë u bë lulishte në kohën kur Basha ishte kryetar i bashkisë, por gjithmonë ishte folur se ai truall në fakt ishte dhënë për ndërtim. Gjatë garës për kryebashkiak si i pavarur Gjegj Bojaxhiu e pati denoncuar këtë gjë, por askush nuk e mori seriozisht.
Akoma nuk ka pasur një reagim të kryebashkiakur Erjon Veliaj për këtë ngjarje. Le të shpresojmë që ai të ketë plane për t’a ristruktuar dhe për t’a përuruar me bujë siç bën me çdo lulishte në qytet. /tesheshi.com
