Negociatat mes Shqipërisë dhe BE-së mund të happen vitin e ardhshëm. Kjo u deklarua nga ministri i Jashtëm i Luksemburgut, Jean Asselborn, i cili po zhvillon një vizitë zyrtare në Tiranë.
Në takimin me ministrin e Europës dhe Punës të Jashtme, Ditmir Bushati, Asselborn tha se duke parë ecurinë e deritanishme, 2018-ta mund të jetë një vit i mirë për Shqipërinë.
Në këtë kuadër, ministri nënvizoi mbështetjen e Luksemburgut për aspiratat e vendit tonë.
“Luksemburgu do t´a promovojë këtë, por s’varet vetëm nga Brukseli, por edhe nga politika e brendshme. Kemi shpenzuar më tepër se 7.6 milionë euro për ndihmë teknike për qytetarët shqiptarë dhe mendoj që diçka e tillë është goxha ndihmë. Ndihma është respektuar nga Shqipëria”, tha ai,
Pak javë më parë gjatë vizitës në Tiranë, eurodeputeti dhe raportuesi për Shqipërinë, Knut Fleckenstein theksoi se Shqipëria mund të hapë negociatat në 2018, gjithnjë nëse zbaton reformën në drejtësi. /tesheshi.com/
