Ministri i Jashtëm i Luksemburgut apeloi që Hungaria të nxirret jashtë Bashkimit Europian për shkak të qasjes armiqësore që njeh vetëm rritje ndaj refugjatëve, ndërsa aktivistët akuzojnë qeverinë e linjës së ashpër të kryeministrit Viktor Orbán se po nxit ksenofobinë për të bllokuar planin europian për risistemimin e refugjatëve.
Jean Asselborn tha se Hungaria duhet ose përkohësisht ose përgjithmonë të përjashtohet nga BE për trajtimin e azilkërkuesve “më keq se kafshët”.
Në intervistën me të përditshmen gjermane, “Die Welt” ai theksoi: “Çdokush që sikundër Hungaria, ndërton gardhe kundër refugjatëve që ikin nga lufta, apo që shkel të drejtën e medias dhe pavarësinë e gjyqësorit, duhet të përjashtohet përkohësisht e nëse është e nevojshme, përherë nga BE”.
Asselborn apeloi për ndryshimin e rregullave të BE-së që të bëhet më i lehtë përjashtimi i HUngarisë ndërsa e cilësoi këtë masë “si të vetmen rrugë për të ruajtur kohezionin dhe vlerat e Bashkimit Europian”.
Human Rights Watch, gjithashtu, apeloi Europën që të përdorë “fuqitë e saj ligjore” kundër Budapestit pas dokumentimit të abuzimit me azilkërkuesit që thotë se shkel detyrimet ligjore të Hungarisë sipas ligjit europian dhe atij ndërkombëtar.
Organizata gjithashtu, ka shprehur alarm nga një fushatë kundër emigrantëve të orkestruar nga qeveria e Orban që synon të rezistojë ndaj çdo përpjekjeje për të vendosur kuota të detyrueshme për pranimin e azilkërkuesve nga shtetet anëtare.
Më 2 Tetor, Hungaria pritet të mbajë një referendum kundërthënës për planin e rialokimit, që përfshin pranimin e 1294 azilkërkuesve në Hungari. Qeveria e Orbán ka shpërndarë një fletpalosje prej 18 faqesh për miliona hungarezë në të cilin apelon qytetarët të refuzojnë planin për shkak se siç thuhet “vendosja e detyrueshme rrezikon kulturën dhe traditat tona”.
Aktivistët kanë akuzuar BE-në se po qëndron virtualisht e heshtur përballë kësaj retorike të qeverisë hungareze. Megjithatë, ata nuk janë dakord edhe me përjashtimin e Hungarisë nga BE pasi do të bënte më shumë dëm sesa mirë.
Fletpalosja hungareze përfshin imazhin e emigrantëve dhe azilkërkuesve, që mbajnë radhë për të hyrë në Europë, me një ngjashmëri të madhe me të shumëkritikuarin, posterin “Breaking Point” të publikuar nga ish-lideri i Ukip, Nigel Farage gjatë fushats së referendumit në Britani.
Titulli sipër imazhit të radhës së emigrantëve thonë: “Ne kemi të drejtën të vendosim se me cilin duam të jetojmë”.
Retorika e Hungarisë për refugjatët, e izoloi Hungarinë në kulmin e krizës së refugjatëve në shtator 2015, por që prej atij viti, Orban është shndërruar në një figurë të paparashikueshme në politikën europiane. Austria e cila më herët ishte në krah të Gjermanisë duke pritur me dashamirësi refugjatët, tashmë qëndron me Hungarinë duke kërkuar një zgjidhje të stilit austriak për krizën e refugjatëve.
Përgatiti: Juli Prifti – /tesheshi.com/
