Presidenti bjellorus Aleksandër Lukashenko do të kërkojë mbështetjen e Vladimir Putin në një takim kyç të hënën, pas protestave të mëdha në Minsk për fundjavën e pestë me radhë, ku kërkohet dorëheqja e tij.
Lukashenko, duke u përballur me krizën më serioze në 26 vitet e tij në pushtet, do të udhëtojë në vendpushimin e Rusisë në Detin e Zi, Soçi, i vetëdijshëm se fati i tij është në duart e Putinit.
Mbështetja ekonomike dhe ushtarake nga Moska mund ta ndihmojë atë ta kthejë situatën në favor të tij ndërsa forcat e tij të sigurisë merren brutalisht me protestuesit.
Opozita bjelloruse akuzon Lukashenkon për manipulime të zgjedhjeve presidenciale të muajit të kaluar, ndërsa ai thotë se fitoi me mbështetjen e 80 përqind të votuesve. Që nga ajo kohë, mijëra njerëz janë arrestuar dhe pothuajse të gjithë liderët kryesorë të opozitës janë burgosur, dëbuar ose detyruar të largohen nga vendi.
Të paktën 100,000 protestues dolën në rrugët e kryeqytetit Minsk të dielën, duke provokuar Lukashenko me thirrjet “Ju jeni një mi”. Policia thotë se ata kanë arrestuar më shumë se 400 persona.
Veprimet e deritanishme të Putinit dëshmojnë se ai nuk dëshiron të shohë rënien e udhëheqësve të ish-republikës sovjetike fqinje nën presionin e rrugës – megjithëse Lukashenko shpesh ka provuar të jetë një aleat i komplikuar dhe i vështirë.
Muajin e kaluar, Putini tha se ishte i gatshëm të dërgonte forcat e policisë në Bjellorusi me kërkesë të Lukashenkos, por vetëm nëse trazirat në atë vend dilnin jashtë kontrollit.
Dominimi rus
Të hënën, Rusia do të dërgojë forcat e saj në Bjellorusi për stërvitje të përbashkëta ushtarake “vëllazërore sllave” deri më 25 shtator, raporton agjencia e lajmeve RIA, duke cituar fjalët e Ministrit të Mbrojtjes.
Rusia ka ofruar gjithashtu të ristrukturojë borxhin e Bjellorusisë dhe të mbështesë sistemin bankar.
Çmimi i mbështetjes së mëtejshme të Moskës mund të jetë pranimi i Lukashenkos për një dominim edhe më të madh rus mbi të dy vendet.
Kremlini ka mbështetur prej kohësh integrimin më të afërt politik dhe ekonomik me Minskun, duke përfshirë një monedhë të përbashkët, por Lukashenko i ka rezistuar presionit nga fqinji i tij më i fuqishëm.
Sidoqoftë, pozicioni i udhëheqësit bjellorus mund të bëhet jashtëzakonisht i pasigurt nëse protestat vazhdojnë. Protesta e së dielës ishte një nga më të mëdha deri më tani.
“Me këtë protestë, ne duhet të tregojmë se ai nuk kontrollon vendin, se ai nuk është në gjendje të flasë në emër të Bjellorusisë,” tha Gennady, 35 vjeç, një punëtor logjistike që nuk donte të tregonte mbiemrin e tij. /tesheshi.com/
