Në një takim të luajtur në një orë të pazakontë për katalanasit, ata ia kanë dalë vetëm në çastet e fundit të shmangin një humbje në fushën e Real Betisit.
Pritësit kanë zhvilluar një lojë të mrekullueshme në terrenin e tyre, “Estadio Benito Villamarin”, veçse pa mundur ta konkretizojnë atë me fitore.
Betis ka qenë dominues gjatë gjithë pjesës së parë ndaj Barcelonës, që kanë patur mbrojtjen pikën e tyre më të dobët në këtë mesditë të së dielës.
E vlefshme për javën e 20-të të kampionatit spanjoll, ndeshja është zhbllokuar në pjesën e dytë, kur Alex Alegria e ka kaluar në epërsi më në fund Betisin.
Me 15 minuta të mbetura ende për t’u luajtur, lojtarët e Barcelonës kanë këmbëngulur fort, por barazimi do të vinte vetëm në minutën e 90-të. Suarez e dërgoi topin në qoshin e majtë të portës kundërshtare, duke e bërë Adan-in, portierin vendas, të dorëzohej për herë të parë e të fundit në këtë takim.
Rezultati 1-1 e ngjit Barcelonën në vend të dytë, me një pikë më pak se Reali i Madridit, që nuk ka luajtur ende. Siç nuk ka luajtur ende as Sevilja, me 42 pikë, po aq sa Barcelona. Çka do të thotë se katalanasit mund të zbresin sërish më poshtë.
Pas kësaj ndeshjeje të mundimshme, Barcelonën e pret një tjetër 90-minutësh i vështirë të mërkurën, kur do të luajë në Madrid ndaj Atletikos për gjysmëfinalet e Kupës së Mbretit. /tesheshi.com/
