Fituesi i parë i lindur në Spanjë i Topit të Artë, në të largëtin vit 1960, ish-lojtari i Deportivos, Barcelonës, Interit e Sampdorias, e po ashtu ish-trajneri i Spanjës dhe i Interit, mes shumë skuadrave të tjera, është ndalur të flasë për formën e shkëlqyer që po kalon Barcelona.
I quajturi ndryshe Luisito nuk është kursyer në fjalët e mira për skuadrën katalanase në një intervistë të
dhënë për kanalin radiofonik Radio Barcelona. Dhe më së pari ai ka ngritur lart treshen sulmuese të Barcelonës, Mesin, Nejmarin dhe Suarezin.
“Nuk kam parë kurrë treshe si ata,” kanë qenë fjalët e Miramontesit, që ka mëtuar të shpjegojë dhe suksesin e tyre. “Përulësia me të cilën Mesi i ka mirëpritur Suarezin dhe Nejmarin në ekip ka qenë qendrore për të. Të tre kanë treguar vlerësimin se duke e lënë egon e tyre mënjanë mund të shkojnë përpara dhe të arrijnë gjëra të mëdha. Ata treguan se janë krijesa njerëzore inteligjente në adaptimin mes tyre.”
Kur është dashur të flasë për Barcelonën, ja çka thënë ai: “Nëse ky ekip i Barçës vazhdon siç e ka nisur, ata do të krahasohen me ekipin e Guardiolës. Vitin e shkuar ata ngritën tre trofe, asnjë prej të cilëve nuk ishte i lehtë për t’u fituar. Hera-herës ne kemi qenë kritikë për trajnerin, sepse ai nisi të bëjë gjëra të çuditshme. Trajnerët nuk janë ata që i fitojnë ndeshjet. Janë lojtarët me cilësi të jashtëzakonshme që ka Barcelona që e bëjnë këtë gjë. Luis Enrike e ka kuptuar tashmë këtë, dhe ka ndryshuar qasje.”
Intervistuesit e radios i kanë kërkuar 80-vjeçarit energjik dhe një mendim se cili lojtar mund ta fitojë Topin e Artë. “Do duhej të qe mes Mesit, Nejmarit dhe Mylerit të Bajernit. Ronaldo nuk është treguar i madh; ka lojtarë më të mirë se ai këtë vit.”
Edhe pse në moshë të thyer, Luis Suarez Miramontes ende punon për klubin e tij të hershëm në Itali, Interin, si zbulues talentesh. /tesheshi.com/
