Një prej futbollistëve më të spikatur të momentit, uruguajani Luis Suarez u është kthyer edhe një herë momenteve të vështira që kaloi para dy vitesh.
Një kafshim në lojë e sipër ndaj italianit Kielini në fazën në grupe të botërorit të Brazilit i kushtoi shtrenjtë Suarezit, që u dënua nga FIFA të qëndrojë për katër muaj larg fushave të futbollit.
Asokohe te Liverpuli, Luis Suarez u transferua gjatë verës së 2014-ës te Barcelona, por gjatë muajve të pezullimit nuk u lejua madje as të stërvitej me ekipin. Për t’i shtuar të tërë kësaj një dënim në nivel kombëtareje, që e detyronte atë të mos luante në nëntë takime të përfaqësuese uruguajane.
“U trajtova më keq se një huligan,” kujton Suarez, “sepse ta ndalosh dikë të mos luajë një ndeshje futbolli, të mos stërvitet, është e pakuptueshme.”
“Katër muaj pa qenë në gjendje të luaj një ndeshje dhe dy vite dënim ndërkombëtar janë shumë. Thjesht nuk ka kuptim. Eshtë gati më keq se të kisha dështuar në një test dopingu,” thotë ylli i Barcelonës.
Ndërsa në nivel klubesh ai po shkëlqen tashmë me katalanasit, ka mbërritur dhe mbarimi i pezullimit ndërkombëtar. Suarez është i gatshëm, e me gjasa do të jetë në fushë në ndeshjet e ardhshme kualifikuese ndaj Brazilit e Perusë, të vlefshme për botërorin e 2018-ës.
“Më e keqja ka kaluar, e tani është koha të shijoj rishtas të luajturit për Uruguajin, diçka për të cilën kam pritur fort gjatë,” e mbyll rrëfimin e tij Luis Suarez. /tesheshi.com/
