Sulmuesi 29-vjeçar i Barcelonës, një prej lojtarëve më të mirë në qarkullim, e ka mbaruar dënimin e dhënë nga FIFA për të mos luajtur me kombëtaren për atë kafshim të Kielinit dy vite më parë, e ka bërë kthimin më të mirë të mundshëm.
Në Brazil, ndaj përfaqësueses së këtij vendi, Luis Suarez ka lënë shenjën e tij, duke i dhënë Uruguajit barazimin.
Në nisje të së shtunës, takimi mes Brazilit dhe Uruguajit, i vlefshëm për eliminatoret e Botërorit 2018, ka lënë që në fillim të kuptohet se do të jetë emocionues. 39 sekonda kanë mjaftuar që Brazili të kalojë në avantazh. Dagllas Kosta ka shënuar në portën e Muslerës. Vetëm 25 minuta më vonë, në të 26-tën, Renato Augusto thellon rezultatin.
Ndërsa përfaqësuesja braziliane po e kontrollonte mirë lojën, Kavani u ka kthyer shpresat miqve kur ka ngushtuar diferencën pesë minuta më pas. Suarez, i papërmbajtshëm si gjithmonë, një bishë e vërtetë në fushë, ka barazuar me të nisur pjesa e dytë.
Shifrat 2-2 nuk ndryshuan gjer në fund, përkundër përpjekjeve të ndërsjellta, me një sërë rastesh që pasuan më tutje.
Ndryshe Suarezit, shoku i tij te Barcelona, e bashkësulmuesi te katalanasit, Nejmari, nuk arriti të shënojë me Brazilin. E veç kësaj, mori dhe një karton të verdhë, që e pengon të luajë të mërkurën ndaj Paraguajit.
Uruguaji dhe Brazili gjenden në vend të dytë dhe të tretë në renditjen e eliminatoreve të Botërorit 2018 për zonën e Amerikës Latine, përkatësisht me 10 e 8 pikë. /tesheshi.com/
