Barcelona ishte mbrëmë në prag të një tjetër humbjeje brenda katër ditëve, teksa Vilareali kishte epërsinë e një goli në “Camp El Madrigal”. Një perlë e Messi-t në minutën e fundit të lojës, një goditje dënimi e gjuajtur në mënyrë të përkryer, shmangu humbjen.
Barazimi 1-1 ndaj Vilarealit pasoi humbjen ndaj Atletik Bilbaos të enjten, në një ndeshje për Kupën e Mbretit. Me frenimin e mbrëmshëm, Barça zbret në vend të tretë në klasifikimin e kampionatit spanjoll, pas Seviljes, e ka pesë pikë më pak se Reali i Madridit. Nga ana e tyre, madrilenët kanë një ndeshje më pak.
Katalanasit u panë në vështirësi ndaj Vilarealit, por trajneri Luis Enrique nuk pranoi t’i fajësonte ata në konferencën e shtypit të pas ndeshjes.
“Do të më pëlqente të thoja se Barcelona ka luajtur keq, por nuk është kështu. Kemi patur dy paraqitje të kënaqshme ndaj Atletik Bilbaos dhe Vilarealit, por të përfunduara me rezultate të këqija. Ne i merituam tre pikët, kishin shumë raste në lojë,” ka qenë deklarata e trajnerit 46-vjeçar.
Barcelona do duhet të lërë pas zhgënjimin e kësaj jave për të kërkuar fitoren e kualifikimin të mërkurën ndaj Bilbaos në takimin e dytë të një të tetave të kupës. /tesheshi.com/
