Nëpër supermarketet e Tiranës nis sot dhënia e qeseve plastike kundrejt një çmimi. Është kjo një nismë e Bashkisë së Tiranës, përkrahur dhe nga vetë drejtues të supermarketeve me qëllim reduktimin e përdorimit të këtyre qeseve për shkak të dëmit të madh në mjedis dhe shëndetin e njeriut.
Specialistë mjedisorë thonë se dominimi i plastikës në jetën e shqiptarëve përbën një fenomen mjaft negativ. Sipas tyre, shumë vende sot në botë po ndërmarrin nisma deri dhe ligjore për ndalimin e plastikës në përdorim.
Ata përmendin rastin e Ruandës, një vend afrikan i njohur për konflikte, ku lufta më e madhe i është shpallur pranisë së plastikës edhe me nisma ligjore.
Ndërsa në Shqipëri, është Bashkia e Tiranës ajo që ka nisur një fushatë sensibilizimi kundër plastikës, e sidomos qeseve, ku veçohen ato një përdorimshe, për t’i dekurajuar njerëzit që t’i përdorin.
Specialistët këshillojnë që as ushqimet apo uji, të mos mbahen në enë plastike, por të zëvëndësohen sa më shumë me ato qelqi. Sipas tyre, plasika sjell dëm të madh të ekosistem, duke përqëndruar më pas të gjithë pasojat tek shëndeti i njeriut. /tesheshi.com/
