Menaxheri i qytetit të Beogradit, ish-këshilltari i Zoran Xhinxhiçit, Goran Vesiç, ka vendosur të heqë kokën e Juri Gagarinit, kozmonautit të famshëm rus, i cili udhëtoi i pari në kozmos nga platforma e tij, por kjo ka sjellë stuhi në kryeqytetin serb.
Vesiç tha për B92 se e ka bërë këtë pasi monumenti ishte shumë i shëmtuar dhe se koka nuk ishte në proporcion me platformën e monumentit.
Por janë zemëruar shumë filorusët në Beograd, duke i kujtuar Vesiçit jo vetëm të kaluarën si këshilltar i Xhinxhiçit, por edhe përkthimin në serbisht të librit të Barak Obamës, “Kurajo për të shpresuar”. (Në shqip atë libër e përktheu Erion Veliaj).
Por problem është se tani monumenti i ri do të duhet të marrë dritën e gjelbër nga “të gjitha institucionet relevante”, që në rastin aktual është këshilli bashkiak i Beogradit.
Vesiç mundohet të qetësojë kritikët, duke thënë se është vetëm një vendim i përkohshëm: “Gagarin do të ketë një memorial në Beograd të denjë për kontributin që ai ka bërë për njerëzimin”, tha ai, duke shtuar se fondacioni i Vëllezërve Kariç ka shprehur dëshirën për të financuar monumentin e ri.
Megjithatë në takimet që janë zhvilluar së bashku me bashkinë dhe Institutin e Monumenteve të Kulturës, përfaqësuesit e fondacionit nuk kanë rënë dakord me kërkesat.
Siç bën të ditur B92, ende nuk u mësua se kush e urdhëroi heqjen e kokës nga busti i Juri Gagarinit.
Kjo ka mjaftuar që të ziejnë teoritë konspirative në Beograd.
Deri tani Sputnik nuk ka shkruar ende ndonjë gjë… /tesheshi.com/
