Shpërthen lufta ndërmjet shtetit të Malit të Zi dhe Kishës Ortodokse Serbe në Mal të Zi, e cila është pjesë integrale e Kishës ortodokse serbe.
Siç bën të ditur gazeta më e madhe malazeze Vijesti, Metropoliti i Kishës Ortodokse, Amfilohije, me anë të një letre zyrtare ka akuzuar qeverinë malazeze se po i trajton ata “si organizatë kriminale”.
Mitropoliti Amfilohije e ka selinë në kryeqytetin e vjetër malazez Cetinje, ku ndodhet dhe qendra e Kishës Ortodokse Autoqefale e Malit të Zi, e cila drejtohet nga Metropoliti Mihajlo.
Siç e ka bërë të ditur dhe tesheshi.com, kryepeshkopi Mihailo jep shpesh mesazhe paqeje dhe bashkëpunimi. Para pak kohësh ai deklaroi se “Allahu është Një, Atij i lutemi dhe prej Tij ndihmë kërkojmë, dhe askush nuk mund ta mohojë faktin që Muhamedi është i dërguari i Tij”.
Por Kishën Autoqefale të Malit të Zi nuk e ka njohur as Patriakana e Stambollit as ajo e Moskës, e as Kisha Serbe. Kisha e Malit të Zi është në të njëjtin status siç është dhe Kisha Ortodokse e Maqedonisë.
Ndërkaq qeveria e Podgoricës ka deklaruar se shteti është i ndarë nga fetë dhe ajo nuk favorizon askënd prej organizatave religjioze, por ata janë të barabarta sipas ligjit.
Mitropoliti Amfilohije, i cili njihet për qëndrimet e tij antishqiptare, shpesh herë akuzoi Institutin për Mbrojtjen e Pasurisë Kulturore se po ndalon të rinovojë manastirin Rezheviqi dhe objektet e tjera fetare.
Amfilohije tha se Qeveria dhe Ministria e Kulturës ka bërë të ditur se çdo restaurim do të bëhet në bazë të planit që ka Ministria e Kulturës.
Në fakt, Podgorica i druhet një serbizimi të institucioneve fetare, siç ka ndodhur rëndom, për shembull në Krajë, ku Kisha serbe po serbizon thuajse gjithë trevën e pastër shqiptare.
Departamenti për Mbrojtjen e Pasurisë Kulturore të Malit të Zi akuzoi Metropolinë se ka përdhosur vlerat kulturore dhe trashëgiminë antike të manastirit Rezheviqi, ndaj urdhëroi ndalimin e punimeve.
“Ata kanë një marrëdhënie me kishën sikur të ishte një organizatë kriminale, sikur ne po kërcënojmë trashëgiminë kulturore”, tha Amfilohije. /tesheshi.com/
