Të paktën 90 persona janë vrarë gjatë sulmeve ajrore gjatë natës nga forcat qeveritare siriane dhe ruse në gjithë Sirinë, sipas monitoruesve dhe aktivistëve opozitarë.
Shumica e njerëzve janë vrarë rreth provincës Halepo, ku janë bllokuar më shumë se 300,000 civilë në territorin e mbajtur nga forcat rebele.
Sulmet ajrore kanë goditur spitalin e vetëm për gra dhe fëmijë në qytetin Kafr Hamra, ku u vranë 2 persona përfshirë një infermiere, kurse dhjetra tjerë janë nxjerrur të gjallë nga rrënojat, ka njoftuar Mbrojtja Civile siriane.
Sulmet ajrore kanë goditur po ashtu një treg afër qytetit Urem al-Kubra, duke vrarë gjashtë persona, sipas Observatorit Sirian me seli në Londër.
Kjo është një prej shifrave më të larta të viktimave të shkaktuara ditët e fundit.
Ushtria ruse ka paralajmëruar një ndalim tre-orësh të sulmeve ajrore për çdo ditë, me qëllim që të mundësojë hyrjen e konvojëve humanitar, por OKB ka thënë se kjo nuk ka qenë e mjaftueshme për të ndihmuar civilët e bllokuar në qytet.
Këto statistika të zymta kanë ardhur në javën në të cilën OKB e komuniteti ndërkombëtar kanë ripërtërirë thirrjen për ndërprerje të luftimeve në mënyrë që t’u ofrohet ndihmë civilëve që dëshpërimisht kanë nevojë për to. /tesheshi.com/
