Një armëpushim lokal ka hyrë në fuqi në Siri me nisjen e së shtunës, por prej tij është përjashtuar Halepi, ku vijojnë sulmet ajrore.
“Regjimi i qetësisë” do të zgjasë një ditë në rrethinën Guta në lindje të Damaskut, si dhe tre ditë në provincën bregdetare të Latakias.
Ndërkohë, bombardimet kanë nisur rishtas në Halep, me dy zona të goditura më së paku.
Sipas ushtrisë siriane, synimi i armëpushimit të pjesshëm dhe të përkohshëm është që t’u hiqet rebelëve mundësia e një preteksti për të goditur objektivat civile, si dhe për t’i dhënë një shtysë armëpushimit ekzistues.
Siç njofton BBC-ja, amerikanët shpresojnë që ky armëpushim të shërbejë për ndërprerjen e luftimeve në ato zona, e që kjo ndëprerje luftimesh të shtrihet gjer në Halep, ku intensiteti i zjarrit është i lartë. Rusët, duke iu referuar të njëjtit burim, nuk kanë pranuar ta përfshijnë Halepin në armëpushimin e orëve të fundit.
Më shumë se 230 njerëz vlerësohet të jenë vrarë gjatë tetë ditëve të fundit në luftimet në Halep. /tesheshi.com/
