Presidenti amerikan Joe Biden vendosi ndalimin e importit të naftës dhe gazit nga Rusia, si një masë tjetër ekstreme për ta goditur ekonomikisht Moskën.
“Kjo është një lëvizje për të cilën kemi rënë dakord me aleatët tanë dhe jemi të vetëdijshëm se partnerët tanë evropianë mund të mos e ndjekin këtë hap, pasi nuk prodhojnë aq naftë sa Shtetet e Bashkuara. Kjo do të jetë një tjetër goditje e fortë për Putinin. Ne thjesht nuk do të paguajmë për luftën e tij”, tha Biden.
Ai pranoi se edhe amerikanët do t’i ndjejnë deri diku pasojat e kësaj lëvizjeje.
“Çmimin e kësaj do ta ndiejmë edhe këtu në SHBA. Unë thashë se do të jem i sinqertë me popullin amerikan që në fillim. Kur fola për herë të parë për këtë, thashë se mbrojtja e lirisë do të kushtonte para. Do të na kushtojë edhe në Shtetet e Bashkuara. Republikanët dhe demokratët e kuptojnë njëlloj dhe e kanë të qartë se duhet ta bëjmë këtë”, tha Biden.
Ai theksoi se Shtetet e Bashkuara i kishin dhënë Ukrainës më shumë se 1 miliard dollarë ndihmë për të mbrojtur vendin nga pushtimi rus.
“Dërgesat e armëve mbrojtëse mbërrijnë në Ukrainë çdo ditë nga Shtetet e Bashkuara. Ne gjithashtu ofrojmë mbështetje humanitare për popullin ukrainas”, tha Biden. /tesheshi.com/
