Lufta ndaj kultivimit dhe tregtimit të hashashit vazhdon. Vetëm sot ka pasur dy aksione të mëdha në Vlorë dhe Mirëditë.
Policia e Vlortës lajmëron se ka sekuestruar një sasi prej 710 kg kanabis sativa dhe ka arrestuar një person në moshën 71 vjeç.
Operacioni “Weekends” ndoqi furgonin me të cilin po transportohej sasia e drogës dhe sekuestrimi i sasisë u bë në shtëpinë e Selman Hamitaj nga Dukati i Vlorës.
“Pas kontrollit të bërë u zbuluan 27 pako të mbështjella me natriban, dhe 8 çanta sportive. Në flagrancë u arrestua 71-vjeçari Selman Hamitaj dhe ka shpallur në kërkim B. T, 44 vjeç nga Durrësi, si autor i dyshuar që ka lidhje me këtë ngjarje”- njofton Policia.
Një tjetër operacion i quajtur “Agimi” i Policisë së Mirditës ka asgjësuar me anë të djegies 843 bimë narkotike kanabis sativa dhe ka arrestuar 2 persona, në kuadër të operacionit të koduar “Agimi”.
Personat e arrestuar janë 21-vjeçari Gentjan Cupi dhe 32-vjeçari Fatmir Vila, banues në Kaçinar. Këta shtetas, në bashkëpunim me njëri-tjetrin, në vendin e quajtur Kushnen, në një zonë pyjore dyshohet se kanë përgatitur terrenin dhe kanë kultivuar 843 bimë narkotike.
Një ditë më parë në portin e Durrësit u kap një autobus ndërsa transportonte 207 kg kanabis drejt Italisë.
/tesheshi.com/
