Një deklaratë e Policisë thotë se Abedin Oruçi, ish-kreu i Këshillit të Qarkut Kukës, njëherësh ish-kandidat për deputet i Bindjes Demokratike (partia e Astrit Patozit), iu shpëtoi efektivëve që shkuan ta arrestonin në lokalin e tij. Për Oruçin kishte nëj urdhër-ndalimi të lëshuar para dy muajsh, pasi akuzohet për një sërë veprash penale.
Por në një “luftë” më policinë, ku janë bërë barrikadë kundër arrestimit të afërm me Oruçin, ky i fundit ka mundur t’ja mbathë, duke mbetur sërish person në kërkim.
“Efektivët e Drejtorisë Vendore të Policisë Kukës, në zbatim të planit operacional për kapjen e shtetasit në kërkim Abedin Oruçi, pas informacioneve të siguruara në rrugë operative, ditën e djeshme kanë organizuar punën dhe shkuar në ambientin e lokalit në pronësi të tij.
Në momentin që punonjësit e Policisë kanë hyrë brenda ambientit, persona të afërm të këtij shtetasi janë konfrontuar fizikisht me punonjësit e Policisë.
Shtetasi Abedin Oruçi, duke përfituar nga ky fakt dhe duke i kanosur me armë zjarri punonjësit e Policisë, ka mundur të largohet.
Në përfundim të veprimeve procedurale në lidhje me ketë ngjarje, u arrestuan në flagrancë të shtetasit:
O., 32 vjeç, G. O., 34 vjeç, B. M., 35 vjeç, E. M., 18 vjeç, Z. Sh., 19 vjeç dhe B. D., 48 vjeç, banues në Kukës, për veprat penale “Kundërshtimi i punonjësit të policisë së rendit publik” kryer në bashkëpunim dhe ‘Veprime që pengojnë zbulimin e së vërtetës’.
U proceduan në gjendje të lirë, për veprën penale ‘Mosbindja ndaj urdhrit të punonjësit të policisë së rendit publik’, shtetasit: S., 22 vjeç, A. S., 18 vjeç, G. O., 50 vjeç, I. O., 28 vjeç dhe R. S., 21 vjeç, banues në fshatin Mamez dhe në Kukës.
Gjithashtu, janë shpallur në kërkim policor shtetasit Abedin Oruçi, 54 vjeç dhe P. O., 46 vjeç, banues në Kukës.
Materialet i kaluan Prokurorisë së Rrethit Gjyqësor Kukës, për veprime të mëtejshme”, thuhet në deklaratën e Policisë.
Më konkretisht, të arrestuarit janë: Eglant Ollomani, 32 vjeç, Gazmend Oruçi, 34 vjeç, Besmir Muçmata, 35 vjeç, Ermir Markaj, 18 vjeç, Zekria Shehu, 19 vjeç dhe Behar Duraku, 48 vjeç. /tesheshi.com/
