“Presidenti i Republikës Sh.T.Z Ilir Meta nuk puth flamurin e asnjë vendi tjetër, përveç Flamurit Kombëtar, flamurit më të bukur në botë”, është ky një ndër reagimet më të fundit të dala nga Presidenca, ku po konsumohet një përplasje e saponisur mes kreut të shtetit dhe ambasadores së re amerikane Yuri Kim.
Kjo e fundit, e cila ka rreth një muaj që ka nisur detyrën, po ka të njëjtin fat me paraardhësin Donald Lu, e deri diku dhe të të Ngarkuarës me punë Leyla Moss, në raport me Metën, gjithnjë nën sfondin e kundërshtive për detaje të Reformës në Drejtësi, apo qoftë dhe për vetë reformën.
Kujtojmë se fraza “Presidenti i Republikës Sh.T.Z Ilir Meta nuk puth flamurin e asnjë vendi tjetër, përveç Flamurit Kombëtar, flamurit më të bukur në botë”, është dhe në kuadër të veshjes së një kostumi sovranist të kreut të shtetit, shoqëruar dhe me gjeste ekzibicioniste me afsh patriotik, një risi e tij e sjelljes politike shfaqur që vitin e kaluar, kur u vendos në llogoren e një përplasjeje me mazhorancën, e gjithashtu dhe me ndërkombëtarët.
Kjo frazë – “flamurit më të bukur në botë” – i takon në fakt ish-futbollistit të kombëtares Andi Lila, thënë dhe nga ky nën afshe patriotike në një prej puntatave të Procesi-t Sportiv në TCH, i ftuar për të komentuar atë çfarë ndodhi në stadiumin e Beogradit në përballje me Serbinë, ngjarje e vitit 2015. Tashmë, fraza e një futbollisti kalon me huazim te një president. /tesheshi.com/
