Këshilli i Emërimeve në Drejtësi, i njesuar me emrin e kreut Ardian Dvorani, njeriut që presidenti Meta i ka hapur “luftë” për çështjen e emërimeve në Kushtetutese, është sulmuar së fundi nga një tjetër “kështjellë opozitare” brenda ngrehinës shtetërore. Eshtë Avokati i Popullit, institucion i lënë opozitës, që së fundi i është bërë krah Presidencës me paralajmërimin e një padie ndaj KED-it. Arsyeja: është krijuar një “dhomë këshillimi” në shkelje të ligjit.
“Më konkretisht, KED ka miratuar një rregullore në të cilën prezanton konceptin e ‘dhomës së këshillimit’ në mbledhjet e këtij organi administrativ, gjë e cila jo vetëm nuk është e parashikuar në ligj, por edhe nëse do i referoheshim teorisë të së drejtës, është një koncept i përdorur në procedurat gjyqësore dhe jo në ato administrative”, thuhet në një njoftim të Avokatit të Popullit, i cili drejtohet nga Erida Ballanca, një juriste pranë PD-së dhe ish-avokate e kreut të saj Basha, lidhur me pallatin e vjehrrit të këtij të fundit në Vlorë, prishur për shkak të Lungomares pak vite më parë.
“Ne kemi përgatitur padinë përkatëse për të goditur këtë akt nënligjor, por për të mos penguar procesin e krijimit të Gjykatës Kushtetuese, kemi pritur për depozitimin e padisë deri në përfundimin e procesit nga ana e Këshillit për të evidentuar tërësisht problematikat që mund të përfshihen në këtë padi, por edhe për të mos dëmtuar imazhin e reformes së drejtësi. Pra, shumë shpejt ne do të paraqesim këtë padi në gjykatën administrative të apelit, me objekt shfuqizimin e disa prej neneve të dy prej rregulloreve të Këshillit të Emërimeve në Drejtësi”, thuhet në deklaratën e Avokatit të Popullit.
Kështu, ecuria e Reformës në Drejtësi ka marrë një tjetër goditje, ku tashmë Presidenca, në aleancë me Avokatin e Popullit, po “rrethojnë” KED-in, aty prej nga burojnë emërimet e disa prej institucioneve bazë të drejtësisë së re. /tesheshi.com/
