Ministri i Brendshëm italian, Marco Minniti tha në Tiranë se duhen goditur organizatat e mëdha që menaxhojnë trafikun e drogës. Ai e cilësoi këtë fazë të dytë të rëndësishme në bashkëpunimin mes dy policive gjatë një konference në Tiranë duke u shprehur se ky është objektivi i rëndësishëm për të cilin duhet punuar së bashku.
“Ne duhet të godasim trafikantët, organizatat e mëdha që menaxhojnë këto trafiqe. Duhet të godasim të paprekshmit, sepse në Europë, Itali, Shqipëri nuk ka të paprekshëm. Ky është objektivi i rëndësishëm për të cilin duhet të punojmë së bashku” tha Minniti.
Deklarata u bë në Pallatin e Kongreseve ku u zhvillua ‘Konferenca e përbashkët mbi raportin përmbyllës së misionit të monitorimit ajror për vitin 2017, në luftën kundër kultivimit të bimëve narkotike’, ndërmjet Policisë së Shtetit, Policisë italiane dhe Misionit të BE-së.
Raporti i monitorimit ajror i Guardia di Financa tregon se parcelat e kanabisit janë reduktuar. /tesheshi.com/
