Kur vjen puna për të shkatërruar një bandë trafikantësh droge, tre shtete të rajonit kanë lënë mënjanë konfliktet e kahershme dhe kanë bashkuar forcat. Policia e Shqipërisë, Kosovës dhe ajo e Serbisë janë bërë një “grusht” i vetëm për të goditur një rrjet trafikantësh.
Iniciatore e këtij aksioni ishte policia e Kosovës, e cila ka pikasur një grup të tillë, të cilët po kërkonin të zgjeronin biznesin nga Shqipëria për në Serbi.
Gjatë ndërhyrjes janë sekuestruar rreth 10 kilogramë drogë, si dhe dy automjete. Në njërën makinë po transportohej lënda narkotike, ndërsa tjetra e shoqëronte. Rasti është bërë publik në një emision në Kosovë. Mësohet se ngarkesa kishte si destinacion shtetin serb dhe trafikantët do të bënin shkëmbimin në afërsi të Vushtrrisë.
Aksione të ngjashme mes policisë shqiptare dhe asaj të huaj janë të vazhdueshme, por bashkëpunimet më të mëdha janë me atë të Italisë dhe Greqisë. Kjo pasi, trafikantët e shikojnë më fitimprurëse rrugën drejtë këtyre shteteve, pasi janë edhe më afër Perëndimit.
Këto aksione janë një mënyrë shumë e mirë për të reflektuar edhe politikën, që kur bëhet fjalë për të krijuar më shumë stabilitet në jetën e përditshme, mund të jetë e vështirë, por jo e pamundur për të gjetur gjuhën e përbashkët./tesheshi.com/
