Përplasja që nuk ka të ndalur mes Rusisë dhe Turqisë pas rrëzimit të avionit luftarak rus ka patur një ndikim të madh dhe në shkëmbimet tregtare mes dy vendeve. Rusia u ka mbyllur derën shumë mallrave turke, në një embargo gati tërësore. Dhe boshllëkun që kanë lënë në tregun rus mallrat e munguara turke, mes të cilave prodhimet bujqësore, po kërkon ta zëvendësojë Siria.
Kështu, siç u lajmërua këtë të martë, Siria do të eksportojë 700.000 tonë agrume në Rusi. E ka bërë të ditur këtë Fares Chehabi, kryetari i Dhomës së Industrisë së Sirisë.
Sipas tij, 700.000 tonë agrume, më së shumë portokaj, po përgatiten të dërgohen në tregun rus. “Ngarkesa e parë është nisur tashmë për në Rusi”, tregoi ai. Gjithashtu kanë për t’u dërguar dhe mallra të tjera, si prodhime tekstili, pjesa më e madhe e të cilave vinin më herët nga Turqia.
Entuziast është treguar dhe kryetari i Dhomës së Industrisë së Damaskut, Samer Debes, i cili citohet të ketë thënë se sanksionet ruse ndaj Turqisë krijuan papritur një mundësi të vërtetë për produktet siriane.
Rusia është aleati më i ngushtë i regjimit sirian të Beshar Esadit, dhe krahas ndihmës së drejtpërdrejtë ushtarake po ofron tashmë dhe ndihmë në aspektin ekonomik, duke krijuar hapësira për tregtimin e mallrave dhe prodhimeve siriane në Rusi. /tesheshi.com/
