Nga Blendi Gashi
17 vjet pas përfundimit të luftës, vijnë sinjale se në katër apo pesë vitet e ardhshme mund të ndodh një luftë e re. Këtë herë jo me Serbinë, por me shtetin tjetër fqinj, Malin e Zi, me të cilin shtet Kosova momentalisht ka raportet të shkëlqyera.
Paralajmërimin e ka dhënë opozitari më i “fortë” në Kosovë, ish-kreu i Vetëvendosje-s, Albin Kurti. Dhe sipas tij, është pikërisht çështja e Demarkacionit që mund të bëhet shkak për të kapur sërish armët.
“Kufiri është çështje e ndarjes së territorit. Nuk kemi tokë për të falur. Në atë tokë është derdhur gjak dhe ne s’kemi gjak për të falur. Thaçi dhe Mustafa të japin dorëheqjen. Në 4-5 vitet e ardhshme ka gjasa të ketë përsëri luftë”, deklaroi të martën Kurti në një takim në Tiranë, në Sallën UNESCO në Muzeun Kombëtar, ku foli për çështjen e demarkimit të kufirit me shtetin malazez.
Pak kohë pas deklaratës së bërë nga Kurti dje në Tiranë, Vetëvendosje ka dalë me një sqarim.
Zëdhënësja e partisë, Tinka Kurti ka shkruar në llogarinë e saj në Facebook, se Kurti ka thënë se “me shumë ka gjasa që të ketë luftë, sesa që të mos ketë luftë”.
“Ballkani po rrezikohet prej stuhive të reja, për bindjen time, dhe nëse nuk ndryshon diçka, atëherë, në 4 -5 vitet e ardhshme, më shumë ka gjasa që të ketë luftë, sesa që të mos ketë luftë. Nuk po them që do të ketë luftë, mirëpo nëse nuk ndryshohet diçka, nëse nuk fuqizohemi e organizohemi, nëse nuk i zmbrapsim këto apetite, atëherë dobësia jonë do të shndërrohet në një magnet për apetitet e shtuara të të tjerëve, dhe asisoj ne rrezikojmë që edhe një herë të ndodhemi para konflikteve të përgjakshme”, citohet të ketë thënë Albin Kurti sipas zëdhënëses së VV-së Tinka Kurti.
Se mund të ketë luftë me Malin e Zi pas ca vitesh, Kurti, e tha sërish edhe përmes një interviste dhënë për gazetën Zëri, ku deklaroi se “Demarkacioni, i Murat Mehës, bën konfliktin, luftën dhe gjakderdhjet e reja me Malin e Zi”, duke shtuar se personalisht është kundër luftës me Malin e Zi, por, siç thotë ai, “lufta ndodh ku është kontesti kufitar e territorial”.
Por, si e shohin analistët një deklaratë të tillë, dhe realisht a mund të çojë Demarkacioni drejt një lufte të re?
Njohësi i rrethanave politike në vend, Leon Duhanaj, njëherit ish-bashkëpartiak i Kurtit, thotë se retorika dhe aktivitete të cilat japin shenja të qarta të nxitjes së luftës, tashmë kemi dita-ditës, çdoherë e më shumë, jo vetëm me fjalë por madje dhe në vepër, siç ishte akti i vendosjes së flamurit kombëtar dhe pllakata e vendosur në kufi me Malin e Zi.
“Brenda mesazhit të tij nuk ka vetëm thirrje për luftë kundër një shteti fqinjë siç është në këtë rast Mali i Zi, por ka edhe një tentativë për të nxitur debat dhe përçarje edhe brenda Kosovës.
Deklarata e tij se lufta mund të ndodhë vetëm përgjatë kufirit ndërsa në Prishtinë jo, në njërën anë mund të jetë një paralajmërim se ka ndonjë agjendë të përgatitur për të zhvilluar ndonjë akt luftënxitës në përgjatë zonës kufitare. Dhe në anën tjetër, përpjekja për të nxitur përçarje dhe ndasi brenda shqiptarëve të Kosovës, kinse në luftën e Kosovën, Prishtina nuk paska qenë në luftë dhe nuk është luftuar. Atëherë do t’i shtroja një pyetje atij; pse e ka pranuat certifikatën dhe statusin e veteranit?”, thotë Duhanaj, për tesheshi.com.
Por analisti politik, Faik Krasniqi, ka mendim tjetër nga Duhanaj, pasi pajtohet me Kurtin se nëse Kosova i falë tokë Malit të Zi, mund të vije deri te një “luftë’ ose konflikt me këtë shtet në të ardhmen, ashtu si edhe me Serbinë nëse Asociacioni pranohet në këtë mënyrë siç është, sepse serbët pas një dekade do të kërkonin të shkëputeshin nga Kosova, siç po tentojnë të veprojnë serbët e Bosnjës me organizimin e një Referendumi për shkëputje nga Bosnja.
“Prandaj nuk do të ishte fundi i botës nëse vija kufitare me Malin e Zi lihet pezull, të dërgohet në Arbitrazh Ndërkombëtar dhe kjo Gjykatë të vendos. Kurse Asociacionit të komunave me shumicë serbe, t’i hiqen kompetencat ekzekutive që ka në këtë formë, në mënyrë që mos të kishim probleme dhe konflikte me shtetet fqinje dhe serbët e Kosovës! Do të shmangeshin të gjitha problemet për konflikte ose ‘luftë ‘të mundshme që ka përmendur z.Kurti”, thotë Krasniqi, për tesheshi.com.
Edhe analisti Islam Krasniqi, thotë se gjithmonë kur janë prekur kufinjtë e shqiptarëve janë përcjellur me luftëra, dhe sipas tij Kurti është bazuar në këtë.
Krasniqi, shton se çështja e Ballaknit nuk është zgjedhur ende, dhe se shqiptarët diskriminohen në të gjitha nivelet, në shtete që i ndanë, si në Mal të Zi, Serbi dhe Maqedoni.
“Nëse nuk fuqizohemi, organizohemi, nëse nuk lihen anash inatet personale, dhe nuk punohet seriozisht për një shtet ligjor e demokratik, duke i ruajtur kufinjtë, mund të vij edhe të ndonjë konflikt i ri në Ballkan, sepse kjo klasë politike po ndihet inferiore ndaj fqinjëve, dhe me veprimet e saj të papërgjegjeshme po e nxit popullin që të marr drejtësin vetë në dorë.
Z. Kurti e ka lidhur deklaratën e tij më shumë në aspektin kombëtar, që shqiptarët të bashkohen dhe të organizohen si një trup i vetëm, për ruajtjen e territorit të vendit, sepse Kosova po coptohet pak nga pak, dhe të mund të kujdeset edhe për ata shqiptarë që kanë mbetur jasht kufijve, e jo duke i lërë në mëshirën e Zotit”, thotë Krasniqi, për tesheshi.com.
