Pas votës kundër të LSI-së për ngritjen e një komisioni për çështjen çame, nuk vonon dhe PDIU i kujton Metës prangat për aferën e CEZ dhe mbështetjen polititike e financiare që i jep Klemend Balilit
Shpëtim Idrizi dhe partia e tij e bazuar kryesisht në çështjen çame ka marrë një pozicion të fortë politik duke e rritur ndikimin e tij në skenën politike në mënyrë të atillë që ka frikësuar king-makerin e politikës Ilir Metën. Duket qartë se vetë kryeministrit Edi Rama dhe partisë së tij i intereson fuqizimi i PDIU-së së Idrizit për të vënë në pozitë LSI-në e Metës në prag të zgjedhjeve të reja parlamentare që do të riformulojë koalicionet politike.
Ka qenë kryeministri Rama që pasi krijoi qeveri me Metën futi në koalicion Idrizin duke i dhënë koalicionit pamjet tri-krerëshe. Fuqizimi i Idrizit me numra në Kuvend dhe me pushtet në administratë duke marrë pozicione drejtorësh e zv-ministrash ka sjellë dhe fuqizimin e tij politik, gjë që ka vënë në dilemë Metën dhe rolin e tij të ardhshëm në bërjen e koalicioneve. Tashmë dy aleatët e Ramës i janë sulur njëri-tjetrit.
Lufta Idrizi-Meta
Sot Konferenca e Kryetarëve ka shtyrë sot kërkesën e PDIU-së për një komision të posaçëm për çështjen çame, ku LSI u shpreh totalisht kundër. LSI ka qenë kundër me pretendimin se “nuk është në juridiksionin tonë dhe nuk ka kohë për komisionin. Hetimi i genocidit është hetim penal, e bën një gjykatë”.
Nuk ka vonuar sulmi i Shpëtim Idrizit nëpërmjet medias së tij duke paralajmëruar se Meta do të arrestohet për aferën e CEZ-it.
“Meta ndjen prangat nga afera “CEZ” e vrasja e Tepshit, ndihmë nga Nishani. Pse kreu i LSI nuk e shkarkon kryebashkiakun Rigers Balili, të izolojë financiarisht Klementin Balilin?!” – shkruan media online 27.al, e afërt me Shpëtim Idrizin.
Duke marrë shkas nga letra e Metës për Nishanin, në shkrim flitet për lidhjet e Ilir Metës me Klement Balilin, një ish-zyrtar i LSI-së.
“Kërkohet mbledhja e Këshillit të Sigurisë Kombëtare pikërisht për një njeri, qoftë ky dhe supertrafikant apo siç quhet “Eskobari i Ballkanit”, pavarësisht se është ish-zyrtar i LSI i vënë me dorën e Metës Drejtor Rrugësh, pavarësisht se vijon të jetë anëtar i LSI, madje i devotshëm. Ilir Meta ka kërkuar ndihmë nga Nishani për të mbledhur Këshillin e Sigurisë kundër Balilit të tij, duke tentuar njëherësh të sulmojë strukturat ligjzbatuese të shtetit dhe në veçanti Ministrinë e Brendshme dhe ministrin Saimir Tahiri se nuk po arreston dot Klemend Balilin, financuesin dhe njeriun që lëviz drogën e Ilir Metës. Eshtë vërtetë ironike”- thuhet brenda në artikull.
Media afër Idrizit me titull kryesor flet për aferën e CEZ dhe vrasjen e një ambasadori, duke aluduar se Meta ka ndjerë prangat dhe i bën thirrje Metës që nëse e ka seriozisht këtë lojë të ndërpresë mbështetjen politike dhe financiare që po i jep Balilit.
“Prandaj i vjen në ndihmë hallit të Metës, që është trembur nga zbardhja e aferës së CEZ që implikon atë dhe Berishën në këtë vjedhje shumë milionë dollarëshe. Madje i implikon dhe në vrasjen e një ambasadori në Pragë, Qazim Tepshit. Ndaj ngutet Meta për të krijuar një ngjarje me Këshillin e Sigurisë Koombëtare të Nishanit. Por Meta nuk ka vetëm Klemend Balilin e tij. I cili ka deklaruar se nuk ka para, madje dhe kontrolli për ta vënë nën sekuestro pasurinë e tij, superresortin turistik të përuruar nga vetë Meta nuk e paska të tijin. Qenka e vëllezërve të tij. Gjithë ajo pasuri si qenka vënë kështu. Dhe njëri prej vëllezërve të Klemend Balilit ka djalin kryetar të bashkisë së Delvinës. Quhet Rigers Balili, dhe me paratë e këtyre bizneseve, paratë e Klemendit të vendosura të emër të tyre ai është zgjedhur në krye të bashkisë së Delvinës. Atëherë, Meta para se të dërgojë kërkesë në drejtim të Nishanit për të mbledhur Këshillin e Sigurisë Kombëtare, të tërheqë kryetarin e bashkisë së propozuar nga LSI dhe anëtar të strukturave të larta të kësaj partie. Në kuadër të dekriminalizimit të japë dorëheqjen Rigersi, pasi qëndrimi i tij në atë post është një mbështetje morale, financiare dhe partiake për Klemend Balilin në kërkim. Ta bëjë këtë Meta, që ta izolojë politikisht e financiarisht Klemend Balilin, le të japë dorëheqje Rigers Balili dhe të fillojë mbarë puna. Pastaj Meta të bëjë pirueta të tilla. Që i ka paralajmëruar me Ministrin e Drejtësisë Yllli Manjani teksa kërkoi ushtrinë për të luftuar kanabisin dhe po sonte paralel me kërkesën e Metës del në media dhe flet për Balilin. Manjani në fakt nuk duhet të rrijë një sekondë ministër Drejtësie, pasi ai po e zhbën drejtësinë. Meta po lëviz, “mijtë” e ndjejnë më shpejt tërmetin dhe po lëvizin, ora e drejtësisë me sa duket ka ardhur. Vihet re te shqetësimi i Metës, që po i projektohen imazhet e prangave të burgut”. /tesheshi.com/
