Numri dy i LSI-së, Luan Rama mendon se zgjedhja e kryeprokurores së përkohshme nuk ka ndodhur, pasi sipas tij, në Kushtetutë nuk ka asnjë emërtesë të tillë si Prokuror i Përgjithshëm i Përkohshëm. Përmes një postimi në Facebook, Luan Rama reagon plot zemërim ndaj atyre që i quan pseudointelektualë “që mezi presin të shfaqen në krah të qeverisë, ani pse injorantë deri në neveri!”.
Në sqarimin e tij për Kryeministrin dhe për “të gjithë ata që flasin pa e njohur ligjin”, Rama shkruan: “Zonja Arta Marku nuk ështē zgjedhur Prokurore e Përgjithëshme e Përkohëshme! Sepse as në Kushtetutë e as në ligj nuk ekziston një emërtesë e tillë! Nuk ekziston funksioni Prokuror i Përgjithshëm i Përkohshëm!”.
Rama citon si argument ligjin 97 të vitit 2016 “Për organizimin dhe funksionimin e Prokurorisë” ku thuhet: “Në rast se mandati i Prokurorit të Përgjithshëm përfundon përpara kohe, përpara krijimit të Këshillit të Lartë të Prokurorisë, funksionet e Prokurorit të Përgjithshëm, me vendim të Kuvendit, caktohet t’i kryejë përkohësisht një nga prokurorët me më shumë eksperiencë nga radhët e prokurorëve dhe që përmbush kushtet dhe kriteret e kreut IV, seksioni I, të këtij ligji”. /tesheshi.com/
