Ka vazhduar edhe më fort goditja e zyrtarëve të lartë të LSI-së ndaj ministrit të Brendshëm Saimir Tahiri.
Luan Rama, sekretar i përgjithshëm i LSI-së, ka përdorur fjalë të ashpra ndaj ministrit të Brendshëm, duke fajësuar institucionin që drejton si përgjegjës për grabitjet dhe klimën e pasigurisë.
“Ngjarjet e tilla të shtuara nuk mund të mbulohen me statistika apo ndonjëherë edhe me konferenca shtypi. Ministria e Brendshme, Policia e Shtetit kushdo tjetër që ka detyrime ndaj sigurisë kombëtare duhet të mbajnë përgjegjësi, duhet të bashkëpunojnë e t’i lënë karshillëqet dhe lojërat e fjalëve.
Unë mendoj se pas një ngjarjeje të fundit, pas sfidës që banditët i bënë shtetit dhe tërësisë së institucioneve të sigurisë në veçanti, duke vjedhur ditën për diell, si rasti i Rinasit, është e rëndësishme një analizë serioze, e përgjegjshme dhe e detajuar për çdo institucion për të nxjerrë përgjegjësitë dhe për të marrë masat e nevojshme”, theksoi Rama në një prononcim për gazetën pranë LSI-së “Sot”.
/tesheshi.com/
