Konventa e LSI-së që nisi me fjalime klishe të anëtarëve të saj më të rinj, u ndez nga batutat ndërsa fjalën e mori Luan Rama. Ndër të tjera, ai u tha të rinjve se nuk e meritonin të ishin pjesë e një vendi të kanabizuar dhe kriminalizuar.
“Nuk e meritoni të quheni rinia e një vendi të kanabizuar, e një vendi të kriminalizuar sepse një pjesë e politikës guxoi ta fuste krimin edhe brenda radhëve të saj”, tha Rama gjatë fjalës së tij.
Rama ka kohë që qëndron në krye të akuzave dhe aludimeve për problemet që nuk funksionojnë në koalicionin qeveritar me partinë Socialiste. Por, duket se për të zbutur situatën apo për të mos u përfshirë prej saj, kreu i LSI-së, Ilir Meta zgjodhi të krijojë humor në sallë.
“Po ta dija qe Luan Rama do ta kishte fjalën kaq të zjarrtë do flisja përpara tij”, tha Ilir Meta, duke shkaktuar të qeshura në sallë. Ai vetë u përqendrua në objektivin e LSI-së për të dalë fituese në zgjedhjet e 18 qershorit, edhe pse pa e bërë të qartë nëse LSI do të hyjë e vetme apo bashkë me PS-në në zgjedhje.
Më herët, ishte Monika Kryemadhi që pasi justifikoi koaliconin me partinë Demokratike, në funksion të liberalizimit të vizave për shqiptarët, foli për integrimin.
“Mos të harrojmë që sot LSI mban një nga postet, ndoshta jo të pushtetshëm, pa polici, pa tendera, siç është ministria e Integrimit.
Është një ministri që në dukje për njerëzit është shumë e rëndësishme për të ardhmen e Shqipërisë. Është një ministri që përballet çdo ditë jo vetëm me intrigat, por dhe me vështirësitë, korrupsionin, pabesitë, indiferencën, paaftësinë herë pas here dhe të administratës tonë e cila cdo ditë të gjithë këtë zullum që e bëjmë dashja pa dashje ne të politikës shqiptare duhet ta mbulojmë, ta pastrojmë apo ta lajmë”, aludoi Kryemadhi. /tesheshi.com/
