Ambasadori Lu ka lëshuar një tjetër mesazh të ashpër ndaj politikës, tashmë që dhe pak ditë është në krye të diplomacisë së Uashingtonit në Tiranë. Dhe sërish në gojën e tij ka qenë ai, Klemend Balili, për të cilin tha se “është një bos i fuqishëm i krimit të organizuar me lidhje politike” – një aludim për të qenët ish-drejtor i LSI-së.
Pasi renditi arritjet, duke përmendur raste gjykimi ndaj njerëzve me precedentë nga politika, Lu u ndal pikërisht te ish-drejtori i LSI-së.
“Dua të theksoj një dështim të qeverisë, prokurorisë dhe të policisë, dështimi për të arrestuar Klement Balilin. Dy vite më parë, DEA punoi me policinë greke për arrestimin e disa anëtarëve të bandës së Balilit në Greqi. Më pas, gjykata greke dënuan Balilin me një dënim të përjetshëm plus 15 vjet heqje lirie. Balili është një bos i fuqishëm i krimit të organizuar me lidhje politike.
Për dy vjet, policia dhe prokurori nuk kanë pasur aftësinë ose vullnetin për ta arrestuar. Askush nuk është mbi ligjin. I bëj thirrje kryeministrit Rama, ministrit Xhafaj, policisë dhe prokurorëve të vazhdojnë luftën ndaj krimit të organizuar pa mëshirë”, tha Lu.
Klemend Balili qëndron i fshehur për më shumë se dy vjet. Në kohën që nga Greqia u shpall akuza ndaj tij për trafik droge shoqëruar me epitetin “Escobari i Ballkanit”, ai dretonte Drejtorinë e Transportit Rrugor në Sarandë, emëruar aty nga LSI. Më parë, familja Balili, ka qenë e angazhuar në strukturat e PD-së. /tesheshi.com/
