Lëvizja Socialiste për Integrim ka ndërmarrë goditjen e dytë të radhës ndaj Edi Ramës. Një ditë pas qëndrimit të Petrit Vasilit dhe hedhjes së tezës “Ilir Meta-Kryeministër”, eksponentë shumë të lartë të LSI-së kanë sulmuar dy nga tezat kryesore të kryeministrit, sërish gjatë qëndrimit të tij në SHBA.
Ndërkohë që Luan Rama, Sekretari i Përgjithshëm i LSI-së ka kundërshtuar propozimin e Ramës për mësimin e njohurive mbi fenë në shkolla, nënkryetari i Lëvizjes Socialiste, Petrit Vasili, ka kundërshtar nismën e Ramës mbi partneritetin public/privat mbi ofrimin e shërbimeve publike, ndryshe konccensioneve
Vasili kundërshton idenë që kontratat të lidhen nga qeveria, pasi sipas tij duhet të kalojnë në Parlament, ku në çdo kontratë duhet të përfshihet edhe Avokatura e Shtetit.
Luan Rama, i cili ishte i ftuar në emisionin “Opinion” së bashku me Myftiun e Tiranës, Ylli Gurra dhe analistin Artur Zheji, paralajmëroi Gurrën se ideja e mësimit në shkolla nuk do të realizohet, duke tingëlluar kështu si një kërcënim politik i LSI-së që do të dalë kundër nismës së Ramës.
Më shumë sesa përmbajtja e këtyre argumentave politikë të partisë së Ilir Metës, bie në sy forma dhe koha e ofensivës politike që ka nisur në publik ndaj aleatit kryesor, Partisë Socialiste.
Duket pak si folklorike, por fakti është që ka dy javë që nuk ka takime Rama-Meta në publik, ndërkohë që ato ishin kthyer në një rit të mërzitshëm dy herë në javë: të mërkurën e zyrën e Kryetarit të Kuvendit dhe të premten në vilën e Mehmet Shehut.
Ndërsa këtë javë mund të justifikohet kjo “prishje riti” si pasojë e vizitës së Ramës në SHBA, javën e shkuar ishin të gjitha kushtet që takimet të mbaheshin.
Por pas kongresit duket se gjërat janë vështirësuar shumë; ndryshe nuk ka sesi të shpjegohen nga dy-tre deklarata të forta të LSI-së në ditë, si breshëri që hidhen brenda oborrit të kryeministrit Edi Rama; që përkthehen politikisht si “klimë lufte” mes PS-së dhe LSI-së. /tesheshi.com/
