Përgjigjes politike të Petrit Vasilit për Pandeli Majkon, i cili kërkoi sqarim me LSI-në për koalicionin me PS-në, i është bashkëngjitur një sulm me breshëri nga përkrahësit e LSI-së në rrjetet sociale, ku sulmohet fuqishëm ish-kryeministri Majko, por edhe kryeministri Edi Rama, i cili cilësohet si mentor i deklatatës që trazoi ujrat.
Dy ditë më parë, në një intervistë për Zërin e Amerikës, nga Filadelfia, Pandeli Majko kërkoi që Edi Rama dhe Ilir Meta të uleshin dhe të zgjidhnin problemet mes tyre pa “ngjala”, pra pa ndarje pushteti.
Majko gjithashtu theksoi se LSI është afruar me PD-në që nga ditët e përplasjes për reformën në drejtësi.
Numri dy i LSI-së, Petrit Vasili, në një dalje për mediat tha se “Unë e vërej të qartë mosinformimin që Pandi ka për çështjet e koalicionit megjithëse sinqerisht koalicioni ynë më duket i vogël në raport me këtë arritje shtetformuese, që u realizua mesnatën e 21-22 korrikut dhe që shtron rrugën e vendit për 30 vitet që vijnë. Megjithatë, deklarimi i z. Meta dhe gatishmëria e plotë për të komunikuar në çdo nivel qoftë edhe të grupeve parlamentare për çështje të koalicionit besoj që e shteron edhe këtë merak të mikut tim, Majko ku theksoj edhe një herë se korrektesa e LSI-së në bashkëpunimin e saj politik do jetë e pandryshuar sikurse dhe gatishmëria për të dëgjuar çdo shqetësim që Majko apo kushdo tjetër mund të ketë”.
Por përtej qetësisë së kupolës së LSI-së, detashmenti luftarak në opinionin publik nuk kanë lë gjë pa i bërë ish-kryeministrit, Pandeli Majko.
Një nga këshilltarët e Ilir Metës, Dritan Kaba, ironizon rëndë Majkon në statuset e tij në rrjetet sociale.
Dikur i kane thene, nuk ndertohet Shqiperia me tullat e vjehrrit, sot po i them nuk behet reforma ne drejtesi me deklamime dhe as me mallkime, por sipas Venecias, nese nuk i pelqen Venecia por i pelqen te themi Stambolli le ta thote dhe ta beje reformen ne drejtesise si ne Anadoll. Nese e do si thote Venecia ta lexoje pa syzet e “vjehrrit”, e kam thene ne 12 mars”, shkruan Kaba.
Ndërsa Ylli Dylgjeri, një tjetër “peshë e rëndë” e LSI-së në fushën përpunimit të opinionit publik, akuzon direkt Edi Ramën, si frymëzuesi i deklaratës së Pandeli Majkos.
Majko është i pa informuar!
Haaaaaa. Kështu tha sot LSI.
Ç’ishte kjo?
Po këtë e kupton Majko? Majko me sa duket nuk e kupton!!! Nuk e kupton edhe pse ulet si nxënësit me zhvillim te vonuar në rreshtat e parë në Kuvend. Nuk e kupton edhe pse ulet ne Rogner kokë me kokë me Bashën. Edhe pse shkon sërisht në USA në Konventën e Demokratëve me Bashën e Metën.
Edhe pse drejton konkursin e zërave të rinj në PS. Majko, është i pa informuar se nuk mund të sqarohet vetëm me një sms Tiranë – Filadelfia.
Majko informohet vetëm kur i vjen Shefi në karrigen ngjitur në Kuvend.
Majko kupton”, shkruan Dylgjeri në rrjetet sociale.
E gjithë kjo lojë që po zhvillohet ditë për ditë mes LSI-së dhe PS-së pas miratimit të reformës në drejtësi, janë veç batare armësh gjysëmautomtike që pritet të shoqërohet me sulmin e artilerisë së rëndë, vetëm pas pak kohe… /tesheshi.com/
