Ditët e fundit tesheshi.com ka publikuar dy përplasje të forta mes eksponentëve të lartë të LSI-së dhe atyre të PS-së, pikërisht në kohën kur Edi Rama ndodhej në SHBA dhe pritej të takonte presidentin Barack Obama.
Por, ka sërish të reja në këtë front. Aleati më i ngushtë i Edi Ramës në qeverisje, LSI-ja nuk ka dhënë asnjë qëndrim publik për bisedimet në Shtëpinë e Bardhë, asnjë koment, asnjë deklaratë.
Madje ka edhe më: gazeta e LSI-së: Integrimi, nuk ka asnjë rresht mbi takimet e Edi Ramës në Shtëpinë e Bardhë apo të tjerët në Uashington.
Mund të ndodhte kjo mungesë hapësire nëse do të bëhej fjalë për takim në orët e vona të natës, ku si pasojë e diferencës kohore me SHBA-në ka qenë e pamundur të arrihej për gazetën e LSI-së. Por gjithçka është zhvilluar brenda një orari normal në Uashington.
Madje edhe intervista e fundit e Edi Ramës në Top Story, ka përfunduar në 22.30.
Ndërkaq, politikanë të LSI-së apo edhe zyrtarë të saj që njihen për aktivitet në rrjete sociale, sërish kanë “thatësirë” në këtë aspekt.
Në murin e rrjeteve sociale të disa përkrahësve të LSI-së që gjithashtu kumbojnë herë pas here statuse gjysmë qëndrime nga selia zyrtare, shpërndahen thënie se takimi i Ramës me Obamën nuk ka shumë rëndësi pasi Obama ikën për 7 muaj nga Shtëpia e Bardhë.
Ndërkaq, këshilltari i Ilir Metës, shpërndan një shkrim të gazetës Washington Times, me titull “Ilir Meta, zëri i moderuar i politikës shqiptare”, e gjitha kjo me diçiturën: Për të gjithë ata që na duan dhe s’na duan:”./tesheshi.com/
