Zv.kryetari i LSI-së, Luan Rama, i është kundërpërgjigjur akuzave të Edi Ramës nga Vora, se LSI po mban peng zyrat e hipotekës për t’u dhënë tapitë e shtëpisë qytetarëve të Vorës.
“Ftoj të 3 mijë familjet që të paraqiten nesër pranë hipotekës së Tiranës për të marrë aktet e pronësisë. Dhe përgjegjës është drejtori regjistrues i hipotekës në Tiranë, të bëjë gati 3 mijë aktet e pronësisë për të dëshmuar se ata e bëjnë sot”, – tha Luan Rama.
Ai nuk harroi të kujtonte edhe se në zyrat e Hipotekës në disa qarqe janë të emëruar njerëz nga Rilindja e nga Edi Rama.
“Më lejoni të bëj të ditur se hipotekën në Qarkun e Tiranës, në Durrës, Vlorë dhe Elbasan, e kanë në dorë pikërisht njerëzit e Rilindjes, të emëruar prej tij”, – ishin fjalët e zv kryetarit të LSI-së.
Nga selia e LSI-së, ai nuk nguroi të thumbonte Ramën, të cilin e quajti “kryetari gjunjëkëputur”.
“Kryetari gjunjëkëputur i Rilindjes tha se LSI në bashkëqeverisje me PS ka ndihmuar vetëm me votat për reformat dhe s’ka bërë asgjë tjetër. Më lejoni të kujtoj vetëm njërën prej tyre më të rëndësishme qe është reforma në drejtësi. Ne nuk e lamë që të bënte reformën në drejtësi siç e donte ai, ne nuk e lejuam këtë dhe të gjithë shqiptarët e dinë që ka qenë këmbëngulja e LSI që reforma në drejtësi u miratua”, – ishin fjalët e nënkryetarit të LSI-së.
