Në zgjedhjet parlamentare të 25 qershorit ndikuan paratë e drogës dhe kriminelëve. Kështu deklaroi kreu i Grupit Parlamentar të LSI-së, Petrit Vasili, gjatë një bashkëbisedimi me të rinjtë dhe të rejat e LRI-së në kampin e Jalës.
“Sot jemi në një situatë të re politike, jo për partitë që janë në qarkullim, por për situatën që prodhuan zgjedhjet. Është një fakt i padiskutueshëm që LSI, arriti rezultatin e saj më të lartë ndër vite. Ky nuk është rezultati i vërtetë, pasi, në qoftë se nuk do të ishin zgjedhjet e drogës dhe kriminelëve, ne do të kishim dyfish vota e mandate”, tha Vasili.
Në vijim ai shtoi se opozita nuk është çështje numrash, por morali dhe se duhet qëndruar fort kundër padrejtësive që u bëhen qytetarëve nga një qeveri që është peng i interesave të shëmtuara.
“Megjithatë, ky është një rezultat shumë i mirë, i cili i përdorur si duhet, është një kapital i jashtëzakonshëm. Opozita nuk është çështje numrash, është çështje morali. Nëse je i vendosur qartë, nuk je i shitur dhe i blerë, nuk je i kapur dhe qëndron fort në çështjet parimore, mjaftojnë edhe 10 njerëz ta mbrojnë këtë çështje si duhet, dhe ajo bëhet çështje e të gjithëve”, vijoi Vasili. /tesheshi.com/
