Aleanca PS-LSI ka funksionuar për mrekulli në rastin e Planit të ri Urbanistik të Tiranës, ndryshe nga sa ndodhi një ditë më parë në Këshillin Bashkiak të Durrësit, ku, votat partisë së Metës iu bashkuan atyre të PD-së, duke rrëzuar buxhetin e Dakos për 2017-ën.
Në Tiranë ndodhi ndryshe, ku si me votë ashtu dhe me fjalë, Meta ishte krah Veliajt me gojën e Shezai Rrokajt.
“Mendoj se puna e bërë nga ekipi i bashkisë ka qenë një punë serioze e cila ka synuar t’u japë disa përgjigje. Mund të themi se realisht plani urbanistik i Tiranës, shumë i rëndësishëm për perspektivën e saj është vënë në qendër të preokupimit të Këshilli Bashkiak që e ka për detyrë të japë vlerësimin e tij por edhe të ketë sensibilizimin e duhur në ata që do të jenë përfituesit e këtij plani”, theksoi Rrokaj.
Ndërsa siç pritej, këshilltarët e PD-së e kundërshtuan ashpër, me pretendimin se nuk është transparent dhe se nuk është konsultuar me qytetarët. Madje, edhe pse më i vogli ndër kolegë, majta e djathtas, Fabian Topollaj, bëri thirrje të prerë për të mos e votuar, duke thënë se “është një plan që betonizon Tiranën, për të siguruar karrierën e kryetarit të bashkisë.”
Ndërsa Veliaj është mbrojtur me gjuhë teknokratike, duke e shpalosur planin në terma zhvillimi. /tesheshi.com/
