LSI ka mbushur 13 vjet që nga krijimi i saj, ndërsa me këtë rast kryetarja Monika Kryemadhi dhe disa anëtarë mbollën pemë në zonën e Fushës së Aviacionit në Tiranë.
Kryemadhi tha se LSI solli ndryshime në jetën politike, por edhe tek rinia shqiptare, pasi në thelb të kësaj force politike ishin dhe janë brezat e rinj.
“Sot e kujtojmë këtë ditë themelimi me dashuri të madhe dhe përgjegjësi sociale ndryshe nga festat e zakonshme. Në këto 13 vite LSI u rrit si forcë politike, në të mirat e saj, sfidat e sakrificat që kaloi gjatë kësaj kohe. Jemi rritur e forcuar më shumë”, tha ajo.
Kryemadhi nënvizoi se edhe pse zgjedhjet e 25 qershorit ishin të deformuara, 225 mijë e 73 votues kanë qenë heronj që edhe përballë presionit dhe policisë së kriminalizuar i besuan LSI-së.
“Përgjegjësia sociale ka qenë motoja e LSI-së që në themelimin e saj. Grupi parlamentar do të jetë shumë aktiv, me nisma jo vetëm në shërbim të qytetarëve por do t’i shërbejë edhe qeverisë. Kemi një qeveri të vogël por jemi të bindur që do jetë me korrupsion të madh. Lufta e LSI-së do jetë frontale për të adresuar dhe zgjidhur problemet”, u shpreh Kryemadhi. /tesheshi.com/
