LSI është e hapur për të nisur diskutimet në lidhje me reformën territorial, ndryshimi i të cilës kërkohet nga PD. Kreu i deputetëve të LSI-së, Petrit Vasili, tha se nuk ka pse të ketë tabu për të hapur këtë çështje, përderisa ne kemi ndryshuar 64 nene të Kushtetutës dhe Rregulloren e Kuvendit e diskutojmë dhe e ndryshojmë sa herë që duam.
“Rishikimi nuk është tabu, nuk kemi pasur tabu të ndryshojmë Kushtetutën me 64 nene, nuk kemi pasur tabu të ndryshojmë rregulloren e Kuvendit sa herë na ka dashur qejfi, nuk kemi pasur tabu për ligjet dhe kodet zgjedhore, nuk kemi pse të kemi tabu për ndarjen teritoriale. Aq më tepër kur kryeministri pati ndër momentet e pakta të sinqeritetit që ky pushtet i ri lokal ka funksionuar shumë dobët, shpërdorimet janë më të mëdha sesa kur ishte me Komuna, modeli nuk tregoi soliditet, cfarë asrye ka te trembemi nga rishikimi”, u shpreh Vasili për BW.
Edhe pse sinjalet e bashkëpunimit mes dy partive opozitare janë dhënë edhe publikisht, Vasili sqaron se mes PD dhe LSI nuk ka negociatë zyrtare për krijimin e një fronti të përbashkët opozitar.
“Jo nuk ka një negociatë në kuptimin siç do e imagjinonit ju, zyrtare apo formale, por ka një përpjekje të qartë të mendimit se një koordinim më i mirë në raport me një qeverisje që ka shkarë rrezikshëm në një mosqeverisje të vendit, për t’iu shmangur problemeve të mëdha si krimi i organizuar, droga dhe ekonomia. Kjo qasje e re, kjo ndjeshmëri e madhe i imponuar nga një elektoral i gjerë që është refuzues, indiferent dhe përbuzës ndaj qeverie kërkon një sinkronizim tjetër politik. Ky moment sinkronizimi eksziston, sa i takon mekanizmave të burokracisë politike nuk kemi hapa të tillë, por kjo ndjeshmëri e re është shumë e rëndësishme sesa këto hapa që natyrshëm mund të kryhen pa asnjë vështirësi”, thekson kreu i grupit parlamentar të LSI. /tesheshi.com/
