Ditën e sotme është hedhur tym mbi çështjen e mos arritjes së një konsensusi mbi draftin e reformës në drejtësi. Përveç opozitës pakënaqësi ka shprehur edhe ministria e Drejtësisë, ndërkohë që titullari i saj Ylli Manjani ka folur nga Lezha
Ministria e Drejtësisë, e cila drejtohet nga Ylli Manjani, një eksponent i LSI-së ka bërë të ditur në një media afër saj se ekspertët e saj nuk janë dakord me draftin e hartuar nga ekspertët shqiptarë dhe ata të SHBA-së dhe BE-së.
Një ditë më parë në takimin e ekspertëve nuk kanë qënë vetëm ekspertët e PD-së që kanë munguar, por edhe ata të Ministrisë së Drejtësisë, duke lënë të kuptohet se për këtë reformë ka tre opinione të ndara.
Ministri i Drejtësisë, duke folur nga Lezha sot ka thënë se opinionet e këtij dikasteri nuk përbëjnë qëndrimin politik të LSI-së por thjesht ata të ekspertëve të këtij institucioni.
Opozita ka këmbëngulur që anëtarët e gjyqësorit të miratohen në Kuvend me shumicë kushtetuese prej 93 votash.
Ndërsa ekspertët e nivelit të lartë janë të qëndrimit që të zgjidhen me shumicë të cilësuar prej 84 votash.
/tesheshi.com/
