Me Ilir Metën në SHBA, LSI ka shpallur sërish qëndrimin e tij kundër të “mëdhenjve” PS dhe PD. Dy nënkryetarët e LSI-së, Petrit Vasili dhe Ylli Manjani, thanë se konsensus nuk do të thotë vetëm marrëveshje mes Ramës dhe Bashës
Gjithashtu, Vasili ka prezantuar edhe zëdhënësin e LSI-së në lidhje me reformën në drejtësi, që do të jetë Ylli Manjani, njëkohësisht edhe nënkryetar i forcës politike të udhëhequr prej Ilir Metës.
Vasili tha “është tepër e rëndësishme të përmbyllet sa më shpejtë dhe me konsensus të gjerë politik, pasi qeveria nuk ka më kohë për të humbur, për t’u fokusuar në gjëra të tjera më të mëdha, me të cilat përballet vendi”.
Manjani ka thënë se reforma në drejtësi nuk duhet miratuar si një pakt i thjeshtë politik.
“Kjo reformë përban një listë të gjatë me projektligje, të cilat janë të një rëndësie të veçantë dhe kanë nevojë për debat publik dhe pasjen e një konsensusi të gjerë. E nëse nuk bëhet me konsensus, atëherë reforma në drejtësi do të ishte e paplotë”. /tesheshi.com/
