Për herë të tretë rresht nga ana e partisë së Ilir Metës kanë ardhur siluret kundër aleatit të saj. Por ditën e sotme gjithçka ka qenë ndryshe.
Numri dy i kësaj partie, Luan Rama ka sulmuar formalisht nga podiumi i LSI-së, qeverinë ku partia e tij është aleate.
Sipas Ramës qeveria shqiptare duhet ta marrë më seriozisht se rekomandimet e Komisionit të Venecias.
Kritikat e LSI-së erdhën në të njëjtën ditë kur Ministria e Financave shpalli tenderin ndërkombëtar për dhënien me konçesion të ngritjes së një sistemi për mbledhjen e TVSH-së.
“E ftoj qeverinë shqiptare të reflektojë me seriozitet, të reflektojë me përgjegjshmëri, ta lexojë në mënyrë të drejtpërdrejtë ashtu siç është shkruar raporti, dhe më lejoni të them dhe nuk e teproj, madje duhet lexuar më me seriozitet dhe më me konsistencë ndoshta edhe se sa rekomandimet e Komisionit të Venecias.
Në raportin mbi Vlerësimin e Transparencës Fiskale, FMN shprehte shqetësim për rishikimin e shpeshtë të buxhetit, duke theksuar se rreziqet kryesore për qëndrueshmërinë financiare të Shqipërisë vijnë nga faturat e kompensimit të pronave, kreditë me probleme dhe konçesionet”, tha Luan Rama.
Dhe, këtë lloj ligjërimi, sikur mos e dinte kush që është i një partie në qeverisje, patjetër që do e merrte për ligjërimin opozitar. /tesheshi.com/
