Pasi u vu në qendër të sulmeve elektorale të dy partive të mëdha, LSI, e cila kërkon të jetë në pushtet edhe pas zgjedhjeve të 25 qershorit, ka nisur betejën e saj në disa fronte.
Ajo ka paditur sot KQZ-në pas një vendimi të saj për të ndarë anëtarin e 3-të të grupeve të numërimit mes saj dhe PDIU-së. Nga ana tjetër kjo parti ka denoncuar dhe grupin Taske-Force për zgjedhjet, në përbërjen e të cilit ka vetëm ministra të PD-së dhe PS-së.
Padia në Kolegjin Zgjedhor
Shorti i hedhur nga KQZ sot, përcaktoi ndarjen e anëtarit të tretë mes LSI dhe PDIU në grupet e numërimit të votave, në zgjedhjet parlamentare të 25 qershorit.
Numëruesi i fundit i papërcaktuar në grupet e numërimit të votave, në tavolinat me numër çift anëtarësh do t’i përkasë LSIsë. Ndërsa PDIU, do ketë anëtar të saj në tavolinat me numër tek. Ky vendim i KQZsë shkaktoi pakënaqësi te përfaqësuesi ligjor i LSIsë, ndërsa nuk pati pretendime nga e PDIUsë.
Lëvizja Socialiste për Integrim i është drejtuar Kolegjit Zgjedhor për ta kundërshtuar këtë vendim.
Ankesa tek ambasadorët
Task forca për zgjedhjet, policia në zgjedhje dhe vendimi i KQZ janë tre çështjet që përfaqësues të LSI-së kanë adresuar shqetësimet e tyre tek të gjithë ambasadorët e BE-së, përfaqësues të ambasadës amerikane dhe shefit të misionit monitorues të zgjedhjeve parlamentare 2017.
“Objekti i këtij takimi ishte informimi për situatën politike në vend. Së pari, veprimin arbitrar të kundraligjshëm të taks force e cila në përpjekje për të bërë spastrime poltike nga administrata publike, gjë që e dokumentuam me dhjetëra raste çka në fakt është parathënie e një tentative për të kontaminuar dhe deformuar të gjitha parimet kushtetuese dhe zbatimit të ligjit në funkson të fushatës së zgjedhjeve”, tha Luan Rama i LSI-së.
Po sot kreu i LSI-së, Petrit Vasili, ka denoncuar një rast dhune të ushtruar ndaj një anëtari të LSI-së. Kreu i kësaj partie është shprehur se ngjarja ka ndodhur në Zharrës të Fierit.
Sipas tij, është dhunuar një anëtari i LSI në Zharrëz, nga ata që ai i ka quajtur “horra të PS”./tesheshi.com/
