Sa më afër vjen data për zgjedhjet lokale, aq më shumë VMRO-DPMNE si parti opozitare akuzon LSDM-në për mosmbajtjen e premtimeve të fushatës si pjesë e ekzekutivit.
Ndaj këtyre akuzave kanë reaguar LSDM duke i quajtur përpjekje skandaloze dhe lajme të rreme të paguara nga VMRO.
“Në një përpjekje të dëshpëruar për t’i hedhur në hije projektet e suksesshme të qeverisë së udhëhequr nga LSDM dhe nga frika për humbjen bindëse në zgjedhjet e ardhshme lokale, VMRO DPMNE çdo ditë krijon lajme të rreme duke u munduar kështu që të ndjellë frikë te qytetarët”, reagojnë nga LSDM.
Kjo e fundit thotë se është lajm i pavërtetë se do të ndërtohen banesa për emigrantët dhe se bie poshtë rritja e pensioneve.
“Pensionistët këtë vit do të marrin rreth 2000 denarë më shumë nga pensioni aktual, në dallim nga 600 denarët e vitit të kaluar. VMRO-DPMNE-ja gënjen. Këto lajme skandaloze dhe të pamenduara nuk i bëjnë dëm as LSDM-së e as Qeverisë që po e udhëheqim. Këto lajme të pavërteta janë kundër interesit publik dhe kanë për qëllim që të shpërndajnë panik, të luajnë me ndjenjat dhe fatin e njerëzve. Përderisa ishte parti qeveritare i frikësonte qytetarët me largim nga puna, burgim dhe dhunë, ndërsa tani vazhdon që ti frikësojë me lajme të pavërteta të cilët dita ditës vijnë duke u bërë më skandaloze. Janë të kota tentimet e VMRO-DPMNE-së përmes lajmeve të tilla të fitojnë pikë politikisht”, thuhet në reagimin e LSDM-së. /tesheshi.com/
