LSDM nga Kumanova sot ka publikuar “bombën” 16 duke lëshuar biseda të përgjuara lidhur me manipulimet gjatë zgjedhjeve të fundit lokale në këtë komunë.
Kryetari i degës së kësaj partie, Martin Kostovski theksoi se protagoniste e manipulimeve dhe keqpërdorimeve të ndryshme është ministrja e brendshme Gordana Jankullovska, e cila planifikon gjitha skenaret për zgjedhjet në Kumanov.
Në bisedën telefonike dëgjohet zëri i Jankullovskës. Ajo thotë se do të flasë me bartësin e listës së “GROM-it”, për të cilin thotë se ai ka disa “banditë” atje si vetë për t’iu siguruar vota. Në një bisedë tjetër ajo thotë se ka siguruar 75 mijë euro për serbët e Kumanovës , ndërkaq më vonë lajmërohet për tu vërtetuar se paratë kanë shkuar tek serbët, apo tek, siç thotë ajo te “shiptarite” – duke iu referuar shqiptarëve.
Kostovski theksoi se qytetarët e Kumanovës nga të gjitha bashkësitë etnike i thanë jo krimit të VMRO-DPMNE-së dhe Nikolla Gruevski. Kumanovarët nuk kanë lejuar të kalojnë kësi lloj skenarësh dhe nuk do lejojnë as në të ardhmen. /INA/
