Zoran Zaev e mban premtimin dhe i afrohet ardhjes në pushtet në Maqedoni. Partia që ai udhëheq, LSDM i ka dorëzuar BDI-së dokumentin me shkrim lidhur me kushtet për koalicionin qeverisës. Këtë lajm për TV Shenja e ka bërë të ditur zëdhënësi i kësaj partie, Petre Shilegov. Mirëpo për momentin nuk japin më shumë hollësi për përmbajtjen e përgjigjes me shkrim, duke thënë vetëm se dokumenti është i mjaftueshëm dhe me të BDI nuk ka më asnjë pengesë për t’i dhënë nënshkrimet e nevojshme që Zaev të marrin mandatin nga presidenti.
“Kemi dorëzuar dokument që mundëson dhënien e shpejtë dhe pa pengesa të nënshkrimeve të nevojshme për të marrë mandatin”, deklaroi për Shenja-n Shilegov.
Nga partia e Ahmetit ende nuk kanë përgjigje nëse do t’i japin nënshkrimet e deputetëve, por Shilegov tha se ata presin që tani BDI të veprojë.
Kujtojmë se pas tentativës së dështuar për formimin e qeverisë nga ana e VMRO-DPMNE-së, presidenti i shtetit ka kushtëzuar LSDM-në si parti e dytë për nga numri i deputetëve, që të mbledh nënshkrimet e minimum 61 deputetëve për t’ia dorëzuar mandatin. M.Krasniqi – /tesheshi.com/
