Partia opozitare maqedonase, LSDM ka alarmuar se për tre javë do të ketë bllokim total të sistemit shtetëror. Më 15 maj sipas tyre, ndërpriten të gjitha kompetencat e kryetarëve dhe këshillave të komunave.
Ata kanë thënë se zgjedhje lokale mund të shpallë vetëm kryetari i ri i Kuvendit, përzgjedhjen e të cilit thonë ata po e bllokojnë deputetët e VMRO-DPMNE-së.
“Për tre javë, nëse nuk debllokohet procesi demokratik, qytetarët do të ngelin pa ndihmën sociale që ju takon me ligj! Pa rroga do të ngelin të punësuarit në komunat, në shkollat, godinat kulturore dhe godinat tjera komunale! Punëtorët e angazhuar përkohësisht në komunat nuk do të mund të marrin kompensimin që u takon! Nuk do të mund të lëshohen leje për ndërtim, vendime për legalizim të objekteve dhe vendime tjera”, kanë thënë nga LSDM.
Që këtu, thonë ata, marrja peng e shtetit dhe qytetarëve që po e bën Gruevski nëpërmjet kryeparlamentarit, Trajko Velanoski dhe presidentit të shtetit, Gjorge Ivanov duhet të ndalojë./tesheshi.com/
